Казань — Татарстан Өрөспүүбүлүкэтин киин куората. Россия кырдьаҕас куораттарыттан биирдэстэрэ. Куорат 2005 сыллаахха 1000 сааһын өрөгөйдөөхтүк бэлиэтээбитэ. Аан дойдуга саамай элбэх ыалдьыттардаах куоратынан аатырар, туристическай бизнес сайдан, сыл аайы 2 мөллүйүөнтэн тахса киһи ыалдьыттыыра бэлиэтэнэр.
Кэнники сылларга Татарстааҥҥа араас таһымнаах киэҥ далааһыннаах тэрээһиннэр ыытыллаллар. Ол курдук, быйыл, муус устар ый 15 күнүгэр, Саха сирин аатыттан «Ньургуһун» үҥкүү-хор Народнай коллективын ыччатын бөлөҕө баран «Танцуй Россия» Норуоттар икки ардыларынааҕы конкурс проегын чэрчитинэн «СИЯЙ» үҥкүү конкурсугар кыттан, полуфиналы ситиһиилээхтик ааста — «Эҕэрдэ үҥкүүтэ» — I истиэпэннээх Лауреат уонна Нам улууһун Аппааны нэһилиэгин киэн туттар, кэриэстиир хореограва, ырыаһыта Петр Сивцев туруоруутунан «Сайыны уруйдаан» иккис үҥкүүнү толорон II истиэпэннээх Лауреат үрдүк аатын ыллылар уонна «СИЯЙ» Норуоттар икки ардыларынааҕы үҥкүү конкурс түмүктүүр тэрээһинигэр — сэтинньи ыйга Москва куоракка ыҥырыы туттулар.
Араас дойдулартан, регионнартан кэлбит кыттааччылары улахан састааптаах үрдүк таһымнаах дьүүллүүр сүбэ сыаналаата. Олор истэригэр: РФ Үтүөлээх артыыһа, хореограф, актер, кинорежиссер, ТНТ телевизионнай ханаал «ТАНЦЫ» проегын уһуйааччыта, «НОВЫЕ ТАНЦЫ» проект дьүүллүүр сүбэтэ Егор Дружинин, Москватааҕы Култуура судаарыстыбаннай институтун Народнай үҥкүүгэ кафедра сэбиэдиссэйэ, РФ култууратын Үтүөлээх үлэһитэ, профессор Юрий Григорьевич Деревягин , Мариинскай театр балетын солиһа, Норуоттар икки ардыларынааҕы үҥкүү конкурстарын хас да төгүллээх лауреата Андрей Иванов, ТНТ киин ханаал «Новые танцы» проект кыайыылааҕа, Россия, Европа, Норуоттар икки ардыларынааҕы IDO турнирын хас да төгүллээх чемпионката, Норуоттар икки ардыларынааҕы фестиваллар Вип-судьуйата Ксения Горячева бааллар.
Конкурс бүтүүтэ, дьүүллүүр сүбэ кыттааччылары кытта кэпсэтиигэ «Ньургуһун» үҥкүү-хор Народнай коллективын ыччат бөлөҕүн толоруутуттан олус астыммыттарын биллэрдилэр.
«Вы и есть живые носители традиций народа Саха! Продолжайте также дальше еще с большим энтузиазмом работать, процветайте, пропогандируйте культуру своего народа» — диэн ис сүрэхтэн үөрэн туран биһиги ыччаппытыгар санааларын эттилэр уонна кэлэн кыттан атын хореографтарга, коллективтарга мастер-класс кэриэтэ саха норуотун үҥкүүлэриттэн көрдөрбүттэригэр улахан махталларын тиэртилэр.
«Ньургуһун» үҥкүү-хор Народнай коллективын балетмейстера, Саха Өрөспүүбүлүкэтин култууратын туйгуна Мария Попова:
«Ансаамбыл аатыттан улахан махтал тылларбытын тиэрдэбит директорбар Николай Михайлович Жирковка, уус-уран салайааччыга Елена Александровна Заровняеваҕа, сахалыы инструменнарынан саҥалыы тыыннаан доҕуһуоллаабыт автор Мария Степановна Григорьева-Маайа салайааччылаах «Нам кылыһах» төрүт дорҕоон бөлөҕөр, музыкабытын запистаан, чочуйан, таҥан биэрбит Андрей Вячеславович Дьяконовка, 14 үҥкүүһүт саҥа көстүүмнэрин түүннэри-күнүстэри быыстала суох тикпит костюмербытыгар Мария Михайловна Потаповаҕа уонна күүс-көмө, өйөбүл буолбут А.Ф. Шестаков аатынан Улуустааҕы норуот айымньытын дьиэтигэр айа-тута үлэлии сылдьар коллегаларбытыгар! Ону сэргэ «Колми» ХЭТ салайааччытыгар Наталья Леонидовна Румянцеваҕа, «Эверест» ХЭТ салайааччытыгар Виталий Егорович Евсеевка, Нам улууһун Култуураҕа уонна духуобунай сайдыыга Управлениетыгар — начальник Семен Прокопьевич Ядрихинскайга, үҥкүүһүппүтүгэр — Намнааҕы киин балыыһа поликлиникатын стоматолог-хируругар Станислав Прокопьевич Соловьевка уонна бэйэм дьиэ кэргэммэр бу ыраах айаҥҥа турунан, улахан конкурска кыттарбытыгар спонсор буолбуттарыгар барҕа махталбын тиэрдэбин. Бу кыайыыбыт — барыбыт ситиһиитэ! Инникитин даҕаны бэйэ-бэйэбитин өйөһө, көмөлөсүһэ туруоҕуҥ! Үлэҕитигэр үрдүк ситиһиилэри, чэгиэн доруобуйаны, тус олоххутугар дьолу!» — үөрүүтүн үллэстэр.
