Бэс ыйын 12-13 күннэригэр Мэҥэ Хаҥалас улууһун Бастакы Тыыллыма нэһилиэгэр «Гавриил Васильевич Никифоров-Манньыаттаах Уолун олоҥхоҕо хоһуйуохха” өрөспүүбүлүкэтээҕи күрэскэ 14-17 диэри саастаах ыччаттар ортолоругар Нам улууһуттан Юра Мордовской «Кылаан кыайыылаах», Эвилья Шадрина «Иккис үрдэл» бэлиэлэринэн толоруу ураты маастырстыбатын үрдүк көрдөрүүлэрин иһин сыаналаннылар. Салайааччылара Вера Куличкина-Цыпандина оҕолор бу күрэскэ олус дьоһуннаахтык ылсан туран дьулурҕаннык бэлэмнэммиттэрин бэлиэтиир: «Өрөспүүбүлүкэтээҕи күрэс устар ууну сомоҕолуур уран тыллаах бастыҥтан бастыҥ ыччаттары уонна улахан дьону түмэн олус сэргэхтик, ураты сонуннук ааста. Уһуйар ыччаттарым ситиһиилэриттэн олуһун үөрдүм уонна төрөппүттэргэ, чугас дьонноругар махталбын тиэрдэбин! » — диэн санаатын үллэстэр.
Саха ыччатыгар өбүгэбититтэн кэлбит ийэ тылбыт оһуор-мандар тыла-өһө кэҥээтин, сайыннын, араас күрэстэргэ эт саастыыларын көрсөргө, алтыһарга, бэйэни тургутунан көрөргө кыах биэрэ турдун!
Об авторе
