Кулун тутар 27 күнүгэр Намнааҕы норуот театра РСФСР уонна Саха АССР Култууратын Үтүөлээх үлэһитэ, ССРС Култууратын туйгуна, «Бочуот Знага» орден кавалера, Нам улууһун Ытык Киһитэ, самодеятельнай композитор, кэрэни кэрэхсэтэр, сырдыкка угуйар култуура эйгэтигэр киэн туттар, холобур оҥостор ытык киһибит Афанасий Федорович Шестаков айар үлэтин кэрчигэр олоҕуран суруллубут «Түүлэй түүнү сырдатан…» испиктээгэ көрдөрүлүннэ.
Испиктээккэ көрөөччүлэр ортолоругар ыҥырыылаах ыалдьыттар — Афанасий Федорович төрөппүт уола Анастас Афанасьевич Шестаков, сиэннэрэ Инна Иннокентьевна Санникова, Варвара Петровна Шестакова, аймахтара, хос сиэннэрэ, Нам улууһун Үөрэҕирии салалтатын начальнига Мария Семеновна Игнатьева, Нам улууһун Култуура уонна духуобунас сайдыытын салалтатын начальнига Семен Прокопьевич Ядрихинскай, өр сыл култуура эйгэтигэр бэриниилээхтик үлэлээбит, Афанасий Федоровичтыын бииргэ айа-тута алтыспыт, үлэлээбит ветераннар кэлэн астына-дуоһуйа көрдүлэр.
Туруорааччы-режиссер, сценарист — Роман Герасимов. Сүрүн оруолларга : Руслан Павлов (П.П.Ядрихинскай-Бэдьээлэ аатынан Олоҥхо Дьиэтин специалиһа), Зоя Петухова (И.С.Гаврильев аатынан Нам 1N оскуолатын учуутала).
Ону тэҥэ кыттыын ыллылар — СӨ култууратын туйгуна, идэтийбит режиссер, сценарист Иван Новиков, СӨ култууратын туйгуна, мелодист, ырыаһыт Афанасий Татаринов, А.Ф.Шестаков аатынан УНАДь култуурнай-маассабай тэрээһиннэр режиссера Михаил Рожин, «Ньургуһун» народнай коллектив хора (сал. Сардаана Харитонова), И.Е.Винокуров аат. Намнааҕы педколледж «Айылҕан» үҥкүү коллектива (сал. Мария Попова) И.С. Гаврильев аат. Нам 1№дээх орто оскуолатын «Күндүл» оскуола театра (сал. Роман Герасимов, Лариса Данилова).
1940 сыл. Сүрүн геройбут оскуола эрдэҕиттэн сөбүлүү көрбүт, билсиһэн алтыспыт доҕоругар Валя Шапошниковаҕа ааспыт олоҕун ахтан санаан ааһар.
1943 сыл. Нам оскуолатын 8-с кылааһын бүтэрбит, сааһын сиппит Афоня уол Аҕа дойду сэриитигэр ыҥырыллан барар арахсыы түгэнэ көрөөччүлэри уйадытта.
1948 сыл. Ыар сэрии сотон ааспыт содулугар оҕустарбыт оччотооҕу оройуон олохтоохторугар ырыа диэн ылламматаҕа ырааппыт, үҥкүү диэн тэбэнэтэ умнуллубут, түмсүүлээх буолуу диэн тутахсыйыбыт кэмигэр Афоня Шестаков кэлиитигэр тыа сирин үлэһит дьоно, ыччата тута сэргэхсийэ, түмсэ түспүтэ.
1950-1960 сыллар. Төрөөбүт сиригэр-уотугар, дьонугар-сэргэтигэр үтүөнү, сырдыгы хаалларар айылҕаттан бэриллибит аналлаах Афанасий Федорович Шестаков тэтимнээх, ньиргиэрдээх үлэтэ саҕаланар. Бу кэмҥэ сүрүн геройбут айар үлэтигэр маҥнайгы хардыыларын, маҥнайгы ситиһиилэрин кэмнэрэ, агитбиригээдэтин бастакы тирэхтэрэ, икки кынаттара буолбут Роза Борисовна Кириллова, Илья Львович Христофоров ахтыллан аастылар.
Испиктээк Афанасий Шестаков оччотооҕу кэмҥэ Бүлүү хочотугар уһун гастролларга сылдьан, Намҥа кыра оҕотун — саҥа киһи кэлиитин күүтэ хаалбыт олоҕун аргыһыгар Валентинаҕа ахтылҕанын, долгуйуутун, тапталын күүһүн туойан анаабыт “Доҕорбор” ырыатынан түмүктэннэ.
Көрөөччүлэр олус астыммыттарын, дуоһуйа көрбүттэрин “Браво!” дорҕоонноох хабыллар ытыс тыаһынан биллэрдилэр.
Айылҕа оҕото, култуура үрдүк искусстватын сүгүрүйээччитэ, норуот нэһилиэстибэтин хаҥатааччыта, кэлэр кэнчээригэ тиэрдэр харайааччыта, дэгиттэр талааннаах салайааччы, ырыа айааччы, улуус киэн туттар ытык киһитэ — Афанасий Федорович Шестаков үтүө аата ахтылла, кэриэстэнэ, ытыктана туруоҕа!
Об авторе
