Нам улууһугар Үрүҥ Тунах ыһыах бэс ыйын 21 күнүгэр Нам киинин «Энсиэли» култуура уонна сынньалаҥ пааркатыгар ыытыллара бигэргэнэн турар. Быйылгы ыһыах саха норуотун уһулуччулаах Государственнай деятеля, биир дойдулаахпыт Илья Егорович Винокуров төрөөбүтэ 130, устар ууну сомоҕолуур уус тыллаах олоҥхоһут, норуот ырыаһыта, Саха АССР култууратын Үтүөлээх үлэһитэ, ССРС суруйааччыларын сойууһун чилиэнэ Прокопий Прокопьевич Ядрихинскай-Бэдьээлэ төрөөбүтэ 125, Нам улууһугар Үөрэҕирии ситимэ тэриллибитэ 155 уонна Дьиэ кэргэн экономикатын сайдыытын сылларыгар ананар.
Бүгүн, ыам ыйын 21 күнүгэр, Н.М.Рыкунов аатынан Улуустааҕы киин библиотекаҕа Нам улууһун кулууп дьиэлэрин үлэһиттэрэ быйылгы улуустааҕы үбүлүөйдээх ыһыах программатын, ыытыллар тэрээһиннэрин туһунан сүбэлэһэ муһуннулар.
Култуура уонна духуобунай сайдыы управлениетын начальнигын солбуйааччы Александра Новгородова өрөспүүбүлүкэ таһымыгар ыытыллаары турар улахан тэрээһиннэр тустарынан иһитиннэрдэ.
А.Ф.Шестаков аатынан Улуустааҕы норуот айымньытын Дьиэтин уус-уран салайааччыта Нам улууһун ыһыаҕын программатын барылын билиһиннэрдэ. Былаанныыр уонна тэрийэр отдел сэбиэдиссэйэ Туяра Петрова ыһыах күрэстэрин балаһыанньаларын быһаарда.
П.П.Ядрихинскай-Бэдьээлэ аатынан Олоҥхо Дьиэтин директора Вера Колпашникова «Дьыллыа маҥан аттаах Дьырыбына Дьырылыатта» улуустааҕы култуурнай-спортивнай күрэх балаһыанньатын быһааран кэпсээтэ.
Светлана Лукина «Сээркэн сэһэнньит — аныгы олох кэпсээнньитэ» олонхо сэһэнин күрэһин туһунан сырдатта.
Салгыы, Култуура уонна духуобунай сайдыы управлениетын специалиһа Сахаяна Орлова РФ култууратын министерствотын ирдэбилинэн нэһилиэнньэҕэ култуура тэрилтэлэрин үлэтин сыаналааһын опроһугар Нам улууһун хаамыытын көрдөрдө. Опрос хаамыытынан култуура дьиэлэрэ инники сайдыыларыгар, Дойдуга, өрөспүүбүлүкэҕэ биллэриллэр араас грант уонна субсидия көрүллүүтүгэр улахан сабыдыаллааҕын чопчулаан бэлиэтээтэ.
Сүбэ мунньахха ыраах сытар нэһилиэктэр култуура дьиэлэрин үлэһиттэрэ ситим нөҥүө быһа эфиргэ олорон иһиттилэр, кэккэ ыйытыыларын биэрдилэр.
Улууска ыытыллар Үрүҥ Тунах ыһыах программата бигэргэннэҕинэ А.Ф.Шестаков аатынан Улуустааҕы норуот айымньытын Дьиэтин сайтыгар тахсыаҕа, нэһилиэнньэҕэ тарҕаныаҕа.
Об авторе
