Алтынньы 31 күнүгэр, Нам киинигэр Модут нэһилиэгин талааннаах олохтоохторо умнуллубат сэргэх киэһэни бэлэхтээтилэр. И.С.Охлопков аатынан Култуура Дьиэтин директора Саргылана Николаевна Ядрихинская-Попова салайааччылаах айар бөлөх ылбаҕай ырыаларынан, көрдөөх сценкаларынан көрөөччү сүргэтин көтөхтүлэр.

«Саҥарба, хотуой!» көр-күлүү театральнай бөлөх салайааччыта СӨ култууратын туйгуна Евдокия Петровна Куличкина-Шамаева. Биир идэлээхпит туруорааччы-режиссер, артыыс, ыытааччы, ырыаһыт, иистэнньэҥ, үҥкүүһүт быһыытынан өрүү көрөөчччү кутун-сүрүн тутар. Тыа сирин олоҕор-дьаһаҕар көстөр араас түгэннэри таарыйаннар, артыыстарга көрөөччүлэр дохсун ытыс тыаһынан махтаннылар.

Модут нэһилиэгин театральнай айар бөлөҕүн олохтоох баһылык Ефим Ефимович Гоголев истиҥ тылларынан эҕэрдэлээтэ, нэһилиэккэ кулууп дьиэтэ дьону кэрэҕэ угуйар биир соҕотох уонна сүрүн тэрилтэ буоларын бэлиэтээтэ.