Нам улууһа ураты көрүүлээх талаанаах хореографтардаах, Норуоттар икки ардыларынааҕы  үҥкүү фестивалларыгар дойдубут үтүө аатын аар-саарга аатырдар, аан дойдуга бастыҥнар кэккэлэригэр киирбит үҥкүү ансаамбыллардаах.

Олортон биир инники күөҥҥэ сылдьар балетмейстер, Саха Өрөспүүбүлүкэтин култууратын туйгуна Мария Спартаковна Попова салайар  «Ньургуһун» үҥкүү народнай коллектива буолар.  «Ньургуһун» үҥкүү  народнай коллектива 1961 сылтан тэриллэн, күн бүгүнүгэр диэри таһаарыылаахтык  айа-тута үлэлиир.

Коллектив киэн туттар үҥкүүһүтэ, хореограва, «Эрэкэ-дьэрэкэ», «Оҕо саас», «Кыталыына» үҥкүү ансаамбылларын салайааччыта  Павел Архипович Винокуров муус устар 29 күнүгэр А.Ф. Шестаков аатынан Улуустааҕы норуот айымньытын дьиэтигэр «Үҥкүү эйгэтэ» проега улуус хороеграфтарын, кинилэр салайан илдьэ сылдьар үҥкүү ансаамбылларын биир түһүлгэҕэ түмэн, көрөөччүлэргэ умнуллубат дьоро киэһэни бэлэхтээтэ.   

Улууспутугар баар үҥкүү ансаамбыллара, коллективтара уонна кинилэр салайааччылара бииртэн-биир кэрэ толорууларынан кыттыыны ыллылар. Ол курдук, Хатыҥ-Арыы  нэһилиэгиттэн «Ылдьаа ыччаттара»  —  Михаил Сивцев, Партизан нэһилиэгиттэн «Күрүлгэн» — Ньургуйаана Сысолятина,  Н.С. Охлопков аатынан Нам улууһун Гимназиятыттан «Стремление» —  Евгения Никифорова,  Хатырык нэһилиэгиттэн «Күн бытархайдара» — Лидия Колодезникова, Аппааны нэһилиэгиттэн «Хатыҥчаан» — Анжелика Ноговицына, Модут нэһилиэгиттэн «Ситим» — Маргарита Шамаева, I-Хомустаахтан А.Н. Окоемов аатынан  «Мичээр» — Ньургуяна Ощепкова, «Күнчээн — Туяра Мохова, хороеграф Сардаана Березкина, Үөдэй нэһилиэгиттэн  «Үөдэй саһарҕата» — Екатерина Николаева,  Хамаҕаттаттан «Ретро Данс» — Любовь Андросова, «Радуга» — Октябрина Попова, Нам нэһилиэгиттэн З.П. Винокуров аатынан Намнааҕы оҕо искусстватын оскуолатыттан  «Ручеек» — Надежда Москвитина,  «Грация» — Саргылана Кудрина,  И.С. Гаврильев аатынан Нам 1№ орто оскуолаттан — Вероника Старостина, «Дьоһун саас» — Мария Слепцова, «Ситим» — Кэрэмэс Саргы, «Кытыйа» — Светлана Неустроева, «Ньургуһун» народнай коллектив уонна «Айылҕан» ансаамбыла, салайааччы  Мария Попова.

Аан дойдуга Үҥкүү күнүнэн проект көҕүлээччитигэр, биир идэлээхпитигэр Павел Архиповичка, проект бары кыттааччыларыгар, үҥкүү алыптаах искусстватын сүгүрүйээччилэригэр төлөннөөх эҕэрдэ!

Дириҥ махталбытын тиэрдэбит — проекка бары кыттыыбыт коллективтарга,  салайааччыларыгар уонна күндү көхтөөх көрөөччүлэрбитигэр.

Өрүүтүн даҕаны талааҥҥытынан бар дьону сөхтөрө, үөрдэ туруҥ! Үҥкүү кэрэ эйгэтэ өрүү дьоҥҥо үтүөнү бэлэхтии турдун!