Кулун тутар 6 күнүгэр Нам улууһун киинигэр А.Ф. Шестаков аатынан Улуустааҕы норуот айымньытын Дьиэтигэр саха төрүт үгэстэрин — дорҕоонун, хамсаныыларын, ырыатын-тойугун сөргүтэн, дьоҥҥо-сэргэҕэ иҥэрии, үйэтитэр туһуттан «Эҥсиэли тэтимэ — кынаттаах дорҕоон» кылыһах-кырыымпаҕа бөлөҕүнэн толорууга I-кы, төрүт дорҕоон доҕуһуолугар саха үҥкүүтүн туруорууга III-с, дэгэрэҥ ырыаны айыыга VI-с төгүлүн Өрөспүүбүлүкэтээҕи күөн-күрэс киэҥ сэҥээриилээхтик ааста.
Күрэс соруктарынан төрүт дорҕоон доҕуһуолун ньымаларын сайыннаран, дэгэрэҥ ырыаны айар дьоҕуру уһугуннаран, кэҥэтэн, тарҕатан, үҥкүү туруорааччылары, саҥа ааттары өйөөн, айар бөлөхтөр репертуардарын кэҥэтии, байытыы буолар.
Тэрийээччилэр: А.Ф.Шестаков аатынан Улуустааҕы норуот айымньытын Дьиэтэ, Нам улууһун Култуураҕа уонна духуобунай сайдыыга салалтата, Христофор Максимов Фондата, Өрөспүүбүлүкэтээҕи норуот айымньытын Дьиэтэ уонна «Туллук хаара» Нам улууһун ырыа айааччыларын түмсүүтэ. Бырайыак сүрүн көҕүлээччилэрэ Мария Григорьева-Маайа, Мария Попова.
Күөн-күрэскэ Дьокуускай, Чурапчы, Нам улуустарыттан кылыһах кырыымпаҕа оонньооччу биирдиилээн уонна бөлөҕүнэн толороччулар, Чурапчы, Кэбээйи, Нам улуустарыттан дэгэрэҥ ырыаны айааччылар, Дьокуускай куорат уонна Хатас нэһилиэгин, Нам улууһун саха үҥкүүтүн туруорааччы-хореографтара, үҥкүү бөлөхтөрө кыттыыны ыллылар.
Дьүүллүүр сүбэҕэ үлэлээтилэр:
— РФ уонна СӨ Доруобуйа харыстабылын туйгуна, Христофор Максимов Фондатын чилиэнэ, Христофор Максимов улахан уола Иннокентий Христофорович Максимов;
— СӨ култууратын Үтүөлээх үлэһитэ, СӨ ырыа айааччыларын уонна театральнай деятеллэрин сойуустарын, Христофор Максимов Фондатын чилиэнэ Саргылана Саввична Адамова;
— РФ уопсай үөрэхтээһинин Бочуоттаах үлэһитэ, СӨ култууратын, үөрэҕириитин, ыччат бэлиитикэтин туйгуна Николай Николаевич Терютин;
— СӨ култууратын туйгуна, Аиза Решетникова аатынан Саха сирин норуоттарын музыкатын уонна фольклорун түмэлин методиһа, “Дуорай” оҕо, “Кыырай” ыччат төрүт дорҕоон бөлөхтөрүн салайааччыта Мичийэ Николаевна Матвеева.
Кыттааччылар толорор маастарыстыбаларын, көстүүмнэри, ырыа, үҥкүү ис хоһоонун тиэрдиитин таһымын көрөн, истэн, дьүүллүүр сүбэ бүтэһиктээх быһаарыытын ылынна.
Дэгэрэҥ ырыаҕа:
Бастакы Үрдэл — Сардаана Макарова, Чурапчы улууһа;
Иккис Үрдэл — Елена Ефремова, Нам улууһа;
Үһүс Үрдэл — Наталья Петрова, Нам улууһа.
«Ааптар ырыатын бастыҥ толорооччу» анал аат — Сайдам Айар Кыыдаана, Нам улууһа;
“Дэгэрэҥ абылаҥа” анал аат — Михаил Пестряков;
“Дэгэрэҥ абылаҥа” анал аат — Роман Степанов;
“Дэгэрэҥ абылаҥа” анал аат — Марианна Макарова;
“Биһирэбил” анал аата — Туйаара Ушканова, Нам улууһа;
Төрүт дорҕооҥҥо:
Бастакы Үрдэл — “Төрүт дорҕоон” бөлөх, салайааччы Сардаана Макарова, Чурапчы улууһа;
Иккис Үрдэл — “Кыл ырыата” бөлөх, салайааччы Любовь Левина, Нам улууһа;
Үһүс Үрдэл — “Сарыада” бөлөх, салайааччы Мария Григорьева, Нам улууһа.
“Бастыҥ доҕуһуол” анал аат — “Айар кыл” бөлөх, салайааччы Сардаана Макарова, Чурапчы улууһа;
“Бастыҥ доҕуһуол” анал аат — Сардаана Попова, Нам улууһа;
Саха үҥкүүтүгэр:
Бастакы Үрдэл — “Айхал” үҥкүү бөлөҕө, салайааччы Татьяна Жиркова, Дьокуускай куорат Хатас нэһилиэгэ;
Иккис Үрдэл — “Ситим” үҥкүү бөлөҕө, салайааччы Кэрэмэс Саргы, Нам улууһа;
Үһүс Үрдэл — СӨ бэтэрээннэрин Ассоциациятын “Эйгэ” үҥкүү бөлөҕө, салайааччылар Дария Андреева, Альсия Иванова Дьокуускай куорат.
“Дьулуур” анал аат — “Күн Дьөһөгөй” үҥкүү бөлөҕө, салайааччы Альсия Иванова, Дьокуускай.
“Дьулуур” анал аат — “Дьоһун саас” үҥкүү бөлөҕө, салайааччы Мария Слепцова.
Төрөөбүт түөлбэҕэ, дойдуга, ийэ тылга тапталы күүһүрдэн, өбүгэ үгэһигэр сүгүрүйэн, норуот сыаннаһа буолар саха ырыатынан, төрүт дорҕоонунан, үгэстэри кэпсиир үҥкүүтүнэн уратытын бу күрэс өссө төгүл бигэргэттэ. Кыттааччылар бэйэ-бэйэлэрин көрөн-истэн, саҥа дьоннуун билсиһэн, алтыһан, олус астыммыттарын биллэрдилэр. Бу курдук, быйылгы күрэс тэрийээччилэргэ, дьүүллүүр сүбэ хамыыһыйатыгар, кыттааччыларга саҥа сүүрэннэр аартыктара арылыннылар.
Кыайыылаахтарга уонна бары кыттааччыларга, дьүүллүүр сүбэҕэ, спонсордарга — Норуот маастарыгар, Нам нэһилиэгин олохтооҕор Андрей Осиповка (бирииһэ — күпсүүр), маастарга, Үөдэй нэһилиэгин олохтооҕор Афанасий Афанасьевка (бирииһэ- кырыымпа), Татьяна Карамзинаҕа уонна “Намыына” улуус туосчуттарын бөлөҕөр (бирииһэ — туос ыаҕыйа), «Туллук хаара» Нам улууһун ырыа айааччыларын түмсүүтүгэр, «Ньургуһун» үҥкүү-хор народнай коллективыгар, Мария Григорьева-Маайа, Зинаида Нератова-Тупсууна дьиэ кэргэттэригэр, сүрүн спонсорга Христофор Максимов Фондатыгар тэрийээччилэр ааттарыттан барҕа махтал!
Инникитин даҕаны маннык иэйиилээх тэрээһиннэр түмэ турдуннар! Аныгыскы күрэскэ көрсүөххэ диэри!
Об авторе
