«Атырдьах ыйын 5-7 күннэригэр Таатта улууһун Амма нэһилиэгэр А.Е. Кулаковскай-Өксөкүлээх Өлөксөй 150 сыллаах үбүлүөйүн көрсө үс күннээх I-Өрөспүүбүлүкэтээҕи «Тыл. Дорҕоон. Дойду» диэн интерактивнай кыл-кырыымпа төрүт дорҕоонноох, сахалыы тыын ситимнээх уһуйаан-лааҕыр үлэлээтэ. Манна Дьокуускайтан, Намтан, Чурапчыттан, Тааттаттан төрүт дорҕоону сэҥээрээччилэр, тарҕатааччылар, уһуйааччылар муһуннулар» — диэн Таатта улууһуттан Татьяна Захарова иһитиннэрэр.
Төрүт тыыны уһугуннарар сайыҥҥы айар лааҕырга Нам улууһуттан «Нам-кылыһах» төрүт дорҕоон бөлөҕүн салайааччыта, А.Ф.Шестаков аатынан улуустааҕы норуот айымньытын Дьиэтин фольклорга исписийэлииһэ Мария ГРИГОРЬЕВА–Маайа уһуйуллааччытыныын, «Сахатранснефтегаз» тэрилтэтин үлэһитэ Александр Максимовтыын кыттыыны ыллылар.
Мария ГРИГОРЬЕВА–Маайа: — Уһуйааҥҥа Нам улууһуттан иккиэ буолан баран кэллибит. Үтүө сиргэ, Ытык Таатта сиригэр 2030 сылга ыытыллар Олоҥхо ыһыаҕар 100 киһи кыл кырыымпанан тыыннаах муусуканы тыаһатарын ситиһэр баҕалаах, биир тэҥ иэйиилээх дьон мустан үс күн дьарыктанныбыт. Мин Анна Ивановна Томская кырыымпаҕа бастакы үөрэнээччитэ буолабын. 2014-2015 сыллардаахха кыл кырыымпа үөрэҕэр уһуйуллубутум. Мантан кыым саҕан, ырыа айабын, ырыа айааччылар сойуустарын чилиэнэбин. Төрүт дорҕооммут бар дьоммутугар тарҕанарыгар, аар-саарга тахсарыгар, тылбыт-өспүт баайа сүппэтигэр үлэлии-хамсыы, кылааппын киллэрсэ сылдьабын. Таатта сиригэр сылдьыахпын баҕарбытым ыраатта. Түгэнинэн туһанан, улуу дьоммут, суруйааччыларбыт төрөөн-үөскээн ааспыт, кинилэр айымньыларыгар хоһуйбут ытык сирдэрин көрөөрү, истээри-билээри, дьоммор-сэргэбэр бэйэм билиибин үллэстээри, уһуйаантан эбии билии ылынаммын тарҕатарбар, суолбун, сорукпун оҥосторбор диэн сырыттым.
Сиһилии https://xn--80aaa3eca.xn--p1ai/tyl-dor%d2%95oon-dojdu-t%d3%a9r%d2%aft-sitim-t%d2%af%d2%bb%d2%aflgete/ сигэнэн киирэн ааҕыаххытын сөп.
Таһаарыыга хаартыскалар Татьяна Захарова ыстатыйатыттан туһанылыннылар.
Об авторе
