Улуу Кыайыы 81 сылын Нам улууһа өрөгөйдөөхдүк бэлиэтээтэ. Ыам ыйы 8 күнүгэр Аҕа дойду сэриитин буойуттарын кэриэстиир умуллубат төлөннөөх Кыайыы скверигэригэр чүмэчи ууруута уонна Георгиевская лента акцията ыытылынна.
Ыам ыйы 8 күнүгэр Аҕа дойду сэриитин буойуттарын кэриэстиир умуллубат төлөннөөх Кыайыы скверигэригэр чүмэчи ууруута уонна Георгиевская лента акцията ыытылынна. Ону сэргэ Аҕа дойду сэриитигэр Нам эр дьоно ыҥырыллан, борохуотунан атаарыллыбыт Ытык сирдэриттэн — Хатыҥ-Арыы нэһилиэгин «Туллук» биэрэгиттэн массыыналар колонналара айаннаан кэлиилэрэ дьон-сэргэ болҕомтотун тарта.
Мемориальнай доскаларга ааттара суруллубут буойуттары, тыылга үлэлээбит төрүттэрин ытыктаан ыччат дьон төрөппүттэрин, эбэлэрин, эһэлэрин кытта тэҥҥэ сылдьан кэриэстииллэрин тухары история үйэтитиллэ туруоҕа.
Ыам ыйын 9 күнүн сарсыардатыгар нэһилиэк киинигэр Улуу Кыайыыны уруйдуур ырыалар ньиргийдилэр. «Умуллубат уокка» сибэкки дьөрбөлөрүн уонна гирляндалары уурдулар. Эһэлэрин, эбэлэрин мэтириэттэрин туппут улуус дьоно, ыччата Доҕордоһуу болуоссатыгар хотоҕостуу муһунна.
«Умуллубат уокка» тыыннаах сибэкки дьөрбөтө уурулунна, ааспыт дьалхааннаах Аҕа дойду сэриитин, тыыл кэмнэрин, кыайыыны уһансыбыт дьоммут ахтылыннылар.
Кыайыы сквериттэн, Доҕордоһуу болуоссатыттан Максим Кирович Аммосов аатынан Киин болуоссакка диэри тэрилтэлэр, нэһилиэктэр колонналара субуруһа хаамтылар.
1941-1945 сс. Аҕа дойду Улуу сэриитигэр Кыайыы 81 сылыгар аналлаах миитиҥҥэ «Нам улууһа” муниципальнай оройуон баһылыга Юрий Слепцов, Нам улууһун вбайыаннай комиссариат военкома Виталий Цуканов, улуус депутаттарын Сэбиэтин председателя Алексей Винокуров, улуус бэтэрээннэрин Сэбиэтин председателя Софья Кобякова, СӨ Ил Түмэнин иһинэн үлэлиир ыччат парламенын президиумун чилиэнэ Владислав Санников ытык ветераннарга, ыччаттарга туһаайан эҕэрдэлэрин тиэртилэр. Байыаннай дьайыыга олохторун толук уурбут байыастар дьиэ кэргэттэригэр «Эр санааланыы» уордьаннарын туттардылар.
«Уостан уос номоҕор Эн хаалыаҥ, бар дьоҥҥор өрүүтүн ахтыллыаҥ…» А.Ф.Шестаков аатынан Улуустааҕы норуот айымньытын үлэһиттэрин, Намнааҕы народнай театрын артыыстарын толорууларыгар литературнай композиция көрдөрүлүннэ. Режиссер СӨ култууратын туйгуна Иван Новиков. кыттыыны ыллылар «Отуу уота» литературнай түмсүү чилиэттэрэ (сал. Алексей Татаринов-Удьурҕай), Нам улууһун киин библиотекатын үлэһиттэрэ (сал. Майя Софронова), «Дьоһун саас» сцена ветераннарын үҥкүү коллектива (сал. Мария Васильева) Намнааҕы народнай театр артыыстара (реж. Роман Герасимов), «Добун» эр дьон ырыа ансаамбыла (сал. Афанасий Татаринов), «Оҕо саас» үҥкүү коллектива (сал. Павел Винокуров), И.Е. Винокуров аатынан Намнааҕы педагогическай колледж студеннарын «Айылҕан» үҥкүү бөлөҕө (сал. Мария Попова) уонна А.Ф.Шестаков аатынан Улуустааҕы норуот айымньытын дьиэтин үлэһиттэрэ (сал. Константин Колодезников).
Набережнайга итии чэйдээх, итии хааһылаах “Саллаат куукуната” үлэлээтэ. Волонтер ыччаттар ытык кырдьаҕастарга күүс-өйөбүл буоллулар.
М.К.Аммосов аатынан Култуура уонна духуобунас сайдыытын дыбарыаһыгар ветераннар мэтириэттэрин фотовыставката турда. Он сэргэ, бэтэрээннэргэ аналлаах бырааһынньыктааҕы остуол тардылынна. Ытык кырдьаҕастар биир түһүлгэҕэ мустан ааспыт сылларын аҕыннылар, үөлээннээхтэрин көрсөн астына-дуоһуйа сэһэргэстилэр.
«Кыайыы сырдык дьаралыга биһигини кууспута» ырыа ымыылаах, үҥкүү кэрэхсэбиллээх эҕэрдэ кэнсиэрэ бэлиэ күҥҥэ бэлэх буолла. П.И. Сивцев аатынан история уонна этнография музейыгар экспозиционнай саалатыгар “Аһаҕас аан күнэ” үлэлээтэ. «Полярная звезда» көрдүүр этэрээт быыстапката Ржев кыргыһыытын хонуутуттан булуллубут Аҕа дойду Улуу сэриитин кэминээҕи артефактарын дьон-сэргэ, ордук оҕолор болҕомтолорун тарта.
Аҕа дойду Улуу сэриитин ытыктабыллаах кыттыылаахтара, тыыл үлэһиттэрэ, сэрии кэмин оҕолоро! Хорсун-хоодуот быһыыгыт, килбиэннээх үлэҕит иһин эһиэхэ сүгүрүйэбит! Үрдүбүтүгэр эйэлээх халлаан баарыгар эһиэхэ махтанабыт! Кыайыыны уһансыбыттарга уруй-айхал буоллун! Эһиэхэ барыгытыгар чөл туругу уонна уһун олоҕу, эйэҕэс сыһыаны уонна этэҥҥэ буолууну, дьолу уонна үтүөнү, эйэни уонна айар-тутар кыаҕы баҕарабыт! Улуу Кыайыы күнүнэн!
Об авторе
