Олунньу 6 күнүгэр «САХА» национальнай көрдөрөр-иһитиннэрэр хампаанньа Анна Васильева ыытааччылаах «Эйгэ» биэриитигэр Нам улууһуттан биир идэлээхпит Елена Александровна КУТУКОВА ыалдьыттаата.
Елена Александровна 1947 сыллаахха олунньу 6 күнүгэр Нам оройуонун Таастаах нэһилиэгэр төрөөбүтэ. Оҕо сааһыттан музыкаҕа тардыһан, билигин өрөспүүбүлүкэбит биир ытыктанар хормейстера.
Алгыстаах бэлиэ күҥҥэ, биэриигэ анаан, Елена Александровна салайар бөлөхтөрө — «Дьүөгэлэр» народнай уонна «Нарыйаана» ырыа ансаамбыллара кыттыыны ыллылар. Ону сэргэ, экраҥа Елена Александровна дьиэ кэргэнин уонна Хабаровскайдааҕы култуура институутун ситиһиилээхтик бүтэрэн кэлбит идэлээх эдэр хормейстер айар үлэтигэр маҥнайгы хардыыларын, алтыһар биир эйгэлээхтэрин, таһаартарбыт кинигэлэрин, ырыанньыктарын, аудиодискэлэрин, салайар айар бөлөхтөрүн, ситиһиилэрин туһунан хаартыскалар көрдөрүлүннүлэр.
Елена Александровнабытыгар өссө төгүл эҕэрдэбитин тиэрдэбит уонна быйылгы Култуура сылыгар түбэһэ «Далбар Хотун ырыата» дьахталларга Аһаҕас күрэс, «Дьүөгэлэр» народнай ансаамбыл тэриллибитэ 35 сылын үбүлүөйдээх тэрээһиннэрэ үрдүк таһымҥа аастыннар диэн баҕара хаалабыт.
Об авторе
