Бүгүн, ахсынньы 1 күнүгэр, Максим Аммосов аатынан киин болуоссакка күөх харыйа дьэрэкээн уоттара сандаардылар! Күүтүүлээх тэрээһиҥҥэ кыра оҕолортон кырдьаҕастарга тиийэ нэһилиэк олохтоохторун остуоруйа персонажтара үөрэ-көтө көрүстүлэр, хаартыскаҕа түһүстүлэр.  

Үгэс курдук, тэрээһин кыра остуоруйаттан саҕаланна. Хотугу муустаах Байҕал хотуна абын-хомуһунун күүһэ бу сырыыга мөлтөөн биэрдэ, күөх харыйа дьэрэкээн уотун сатаан сандаардыбата. Ол кэмҥэ Арсан Дуолай бухатыыр хантан кэлбитэ биллибэккэ баар буолла, кырачааннары куттаан соһутта. Хотугу  муустаах Байҕал хотуна Арсан Дуолай бырааһынньыгы ыһар соругун амалытан алы гынна. Бу кэмҥэ бары оҕолор, улахан дьон төгүрүччү туран Эһээ Дьылы, Хаарчаананы көмөҕө ыҥырдылар. Сылын ахсын дьон-сэргэ саамай күүтүүлээх ыалдьыттара  Эһээ Дьыл сиэнин Хаарчаананы кытта сиэттиспитинэн тиийэн кэллилэр, эҕэрдэ эриэккэһин эттилэр. 

Ленскэй нэһилиэк баһылыга Петр Григорьевич Сокольников чугаһаабыт Саҥа Дьыл бырааһынньыгын бары этэҥҥэ, үөрэ-көтө, сырдык санаа дьаралыгынан куустаран көрсөргө үтүө тылын тиэртэ. Ол кэннэ, кэтэһиилээх күөх харыйабыт уота сандаарда!  

Саҥа дьылбыт саҥалыы салаллан

Санаабытын сандаартын!

Сырдык — кэрэ мичээрин

Саҥа ыраас үөрүүтүн

Салайан аҕаллын!