Ааспыт үйэҕэ айыллыбыт баян — билиҥҥи сыыппара баһылыыр үйэтигэр сэдэхсийэн эрэр музыкальнай инструмент буолар. Ааспыт үйэ дьонугар үлэҕэ, олоххо кынаттыыр, күүс, кыах эбэр баян норуот дьылҕатыгар үтүө өрүттээх дьайыылаах этэ диэн сыыспаппыт буолуо.
Ырыаҕа ылланар ыалдьытымсах Нам киэҥ дуолугар көрөөччү-истээччи сэргиир, биһириир уйаҕас баяны баһылаабыттар үгүстэр. Ахтан ааһар буоллахха, 1957 сылтан Нам сиригэр, баян долгунун саҕалаабыт, ырыаны-үҥкүүнү баянынан доҕуһуоллааһыны киллэрсибит, тэниппит Киһинэн — ССРС культуратын туйгуна, самодеятельнай композитор, аккомпаниатор, «Ньургуһун» народнай үҥкүү-хор коллективы тэрийээччилэртэн биирдэстэрэ — Илья Львович Христофоров буолар. Кини тэлбит суолунан, оройуон уус-уран самодеятельнаһыгар Николай Атласов, Розалья Кокарева, Николай Пестряков, Анна Захарова, Михаил Павлов, Степан Иванов, Афанасий Татаринов, Илья Новиков, нэһилиэнньэҕэ ыытыллар тэрээһиннэргэ өрүү көхтөөхтүк кытталлара, кинилэрэ суох биир да тэрээһин ыытыллыбата.
Олох тэтимнээх сайдыытыгар олорсон, айар куттаах эйгэҕэ уларыйыы-тэлэрийии, саҥа сүүрээннэр, саҥа хайысхалар кимэн киириилэргэр, идэтийбит баянистарбытын кытта тэҥҥэ эдэр дьон баян кыбынан ырыаларга доҕуһуоллуулларын көрөн киһи үөрэр. Ол курдук, Александр Шестаков, Станислав Андреев, Савва Христофоров уонна Нам улууһун оҕо искусстватын оскуолаларын баян кылаастарыгар дьарыктанар үөрэнээччилэр уонна выпускниктар көрөөччү-истээччи биһирэбилин ылаллар, ытыс дохсун тыаһа ньиргийэр.
Алтынньы 10 күнүгэр, Нам улууһун киинигэр, А.Ф. Шестаков аатынан Улуустааҕы норуот айымньытын Дьиэтигэр «Кэллим мин баяммын кыбынан» дьоро киэһэ түһүлгэтигэр улууспут баянистара муһуннулар. Алыптаах дьоро киэһэ көҕүлээччитэ — Саха Өрөспүүбүлүкэтин култууратын туйгуна, Саха сирин ырыа айааччыларын, баянистарын Сойуустарын чилиэнэ, Нам улууһун мелодистарын «Туллук хаара» түмсүүтүн чилиэнэ, «Ньургуһун» үҥкүү-хор народнай коллективын концертмейстера, «Уолан», «Добун» эр дьон ырыа ансаамбылларын төрүттээччитэ уонна салайааччыта, көрөөччү-истээччи сөбүлээн истэр үгүс ырыа ааптара АФАНАСИЙ ТАТАРИНОВ.
Баян алыптаах киэһэтигэр күндү көрөөччүлэригэр умнуллубат матыыптары бэлэхтээтилэр: СӨ култууратын туйгуна, мелодист, «Туллук хаара» Нам улууһун мелодистарын түмсүүтүн салайааччыта Андрей Замятин (Нам), СӨ култууратын туйгуна, «Гражданскай килбиэн» Бэлиэ хаһаайына Николай Пестряков (Нам), СӨ уус-уран самодеятельноһын сайдыытыгар кылаатын иһин бэлиэ хаһаайына Аскалон Егоров (Түбэ), СӨ култууратын туйгуна, мелодист Андрей Старков (II-Хомустаах), СӨ култууратын туйгуна Ариан Васильев (Хатыҥ-Арыы), «Нам улууһун сайдыытыгар кылаатын иһин» Бэлиэ хаһаайына Иван Гоголев (Модут), мелодист Василий Николаев (Үөдэй), Илья Новиков (Нам), Алексей Дьячковскай (Нам), Степан Иванов (Хамаҕатта), И.С. Гаврильев аатынан Нам 1№ оскуолатын 9-кылааһын үөрэнээччитэ, «Коробейники» нуучча ырыатын народнай ансаамбылын солиһа Святослав Барабанов, З.П.Винокуров аатынан Намнааҕы Оҕо искусстватын оскуолатын Баян кылааһын үөрэнээччитэ Талбан Парников.
Ырыанан киэргэттилэр «Дьүөгэлэр» народнай вокальнай ансаамбыл (сал. Елена Кутукова), сцена ветераннарын «Иэйии» түмсүүтэ (сал. Полина Никонова), солистар Марфа Оконешникова, Надежда Макарова, Ирина Иванова, Светлана Куличкина, Сардаана Харитонова, Иннокентий Иванов, Дмитрий Барабанов, Андрей Слепцов, Юрий Иванов, Рустам Дмитриев.
Саха сиригэр Баянистар Сойуустарын бэрэссэдээтэлэ, саха таптаан истэр ырыаларын ааптара, эстрада ырыаһыта Алексей Потапов буолар. Онтон Нам улууһун баянистарын түмсүүтүн салайааччытынан Афанасий Татаринов талылынна.
Биир дойдулаахпыт, Нам сиригэр норуот уус-уран самодеятельнаһын сайдыытыгар бастакы олугу уурбут, култуурҕа дириҥ кылаатын киллэрбит, дэгиттэр талааннаах салайааччы, самодеятельнай композитор Афанасий Шестаков сүрэхтэн сүппэт үйэлээх «Доҕорбор» ырыатынан баян доҕуһуоллаах дьоро киэһэ түмүктэннэ.
