Олох өксүөннэрин, түһүүлэрин-тахсыыларын көрсөн, сайдыылаах үйэбитигэр сэмэй кылааттарын киллэрсибит ытыгылыыр аҕам саастаах дьоммутугар болҕомто ууран, кыһалҕаларын туоратар, чэпчэтэр,  өйүүр-бэлиэтиир сыаллаах үлэҕэ кэрэ эйгэни кэрэхсэтэр Культура салаатын үлэһиттэрэ туора турбакка, өрүү көмө-тирэх буоллаллар.  Ол курдук, биһиги тэрилтэбит иһинэн  «Ньургуһун» народнай үҥкүү-хор коллективыгар,  «Иэйии» Нам сэлиэнньэтин ветераннарын кулуубугар, «Ситим» үҥкүү бөлөҕөр, Намнааҕы народнай театрга,  биирдиилээн толороччуларынан аҕам саастаах дьоммут үөрэ-көтө дьарыктаналлар, араас таһымнаах тэрээһиннэрбитигэр өрүү көхтөөхтүк кытталлар.

Күндү ытык ветераннарбыт, айар куттаах муударай дьоммут! Эһиэхэ, Аан дойдутааҕы аҕам саастаах дьон күнүнэн истиҥ эҕэрдэ!  Дууһаҕытынан кырдьымаҥ, тус бэйэ5ит өрүү сэргэхтик, тэтиэнэхтик туттан, чэгиэнник олорун!

Иһирэх эҕэрдэбит  тыыннаах тырымнас тыллара Ымыы чыычаах кэриэтэ илдьит буолан көттүннэр, аламаҕай кыһамньыгыт иһин махтал тыллара эһигини куруутун арыаллаатыннар!