Балаҕан ыйын 26 күнүгэр кэрэни кэрэхсэтэр, олох-дьаһах кэмин кэрдиистэрин ситимниир иис эйгэтин үүнэр көлүөнэҕэ утумнаан тиэрдэр ураты айылгылаах оһуор үктэллээх бэлиэ күҥҥэ айылҕаттан талааннаах дьоһун киһи — Маргарита Ивановна Чеснокова үбүлүөйдээх  65 сааһын уонна иис эйгэтигэр үлэлээбитэ  50 сылын бэлиэтиир «Стежок длиною в жизнь» айар киэһэтэ ньиргийэн ааста. 

Бу кэрэ киэһэҕэ халадаай, бууктаах, оноолоох соннор уран оһуордара, өҥнөрө таба тигиллибиттэрин дьон сөҕө-махтайа көрдө. Ону сэргэ, дьиэ кэргэнинэн, күннээҕи үлэҕэ-үөрэххэ  кэтиллэр таҥастарынан уонна киэһээҥи кэрэ былаачыйаларынан Маргарита Ивановна дьиэ кэргэнин уонна үөрэнээччилэрин кытта хаамта.   

Нам улууһун баһылыга Юрий Слепцов, Ленскэй нэһилиэк баһылыгын солбуйааччыта Петр Владимиров, улуус култууратын салаатын начальнигын солбуйааччыта Александра Новгородова уонна «Нэлэгэр» түөлбэ салайааччыта Ольга Прядезникова эҕэрдэ эриэккэһин, алгыс маанытын эттилэр.

Дьоро киэһэни «Ретро-Данс» народнай ансаамбыла, «Уйгууна» бөлөҕө кэрэ үҥкүүлэринэн, «Дуорай» эр дьон ырыа ансаамбыла,  Ирина Винокурова, Петр Машников, Андрей Слепцов, Артем Тюкянов ылбаҕай ырыаларынан киэргэттилэр.