Кэлэр 2026 сылга норуот тылынан уус-уран баайын иҥэриммит, норуот ырыаһытын быһытынан элбэҕи айбыт, туойбут, ыллаабыт саха биир талааннаах олоҥхоһута, Саха АССР култууратын үтүөлээх диэйэтэлэ, ССРС суруйааччыларын сойууһун чилиэнэ Прокопий Прокопьевич Ядрихинскай-Бэдьээлэ (31.03.1901—04.02.1979) төрөөбүтэ 125 сыла бэлиэтэнэр.

Ураты дьоҕурдаах Прокопий Ядрихинскай-Бэдьээлэ 1901 сыл кулун тутар 31 күнүгэр Нам улууһун Көбөкөн нэһилиэгэр төрөөбүтэ.
Ороһу сааһыттан олоҥхолуур буолбут. Кини олоҥхолоро 1938 сылтан бэчээттэнэллэр. «Күн Дьөһүөлдьүт» уонна «Дьырыбына Дьыраылыата Кыыс бухатыыр» олоҥхолоро магнитофоҥҥа сурулланнар НВК «Саха» фондатыгар хараллан сыталлар.

Балаҕан ыйын 11 күнүгэр А.Ф. Шестаков аатынан Улуустааҕы норуот айымньытын дьиэтин үлэһиттэрэр Туяра Петрова, Мария Григорьева, Вера Цыпандина-Куличкина Нам улууһун Култуураҕа уонна духуобунас сайдыытыгар салалтатын кытта Фрунзе нэһилиэгин дьаһалтатын, олохтоохторун кытта көрсүһүүгэ сырыттылар. Буолаары турар үбүлүөйдээх сылга үлэ хаамыытын, барылын ырытыһа сүбэ мунньахха кытыннылар.
Эһиилги Бэдьээлэ 125 сылыгар анаммыт үбүлүөйдээх ыһыах Фрунзе нэһилиэгэр ыытыллара былааннанар. Манна араас хайысхаларынан анал комиссия тэриллэн, бу сүдү убайбыт аатын ааттатар тэрээһиннэргэ үлэ барылланар.