Бэс ыйын 21 күнүгэр – күн саамай уһаан, түүнэ кылгаан, Үрдүк Айыылар сиргэ муҥутуур чугаһаан турар кэмнэригэр, Күнү көрсүү сиэрэ-туома ыытыллар. Бу күн куйаар аана аһыллар, өбүгэлэрбит этэллэринэн, үрүҥ илгэ түһэр. Аан дойду дьоно күнтэн күүс ылаллар.
Нам улууһун дьоно-сэргэтэ, ытык-мааны ыалдьыттара күнү көрүстүлэр. Күнү көрсүү сиэрин-туомун алгысчыт Алгыс Бүөтүр тоҕус туруйа уол, аҕыс кыталык кыыс арыалдьыттаах киирэн, алгыстаах алаадьынан, саламаатынан аал уоту айах тутан толордо.
Күнү көрсүү кэнниттэн мустубут дьон оһуохайдаан ойдулар, эһиэкэйдээн эргийдилэр. Оһуохайы Руслан Павлов таһаарда.
Саха күүтэр Үрүҥ Тунах ыһыаҕа аламай маҥан Күн тахсыытыттан саҕаланна, Ытык сиэр-туом толоруутугар Нам улууһун олохтоохторо, ыраахтан кэлбит ыҥырыылаах ыалдьыттара кытыннылар, сырдык сардаҥалаах, сылаас иэйиилээх алгыһынан арчыланнылар.
Быйылгы улуустааҕы Үрүҥ Тунах Ыһыах Улуу Кыайыы 80 сылыгар уонна Нам улууһа төрүттэммитэ 95 сылыгар ананар.
Киирии аартыкка сырылаччы буспут сырдьыгыныы сылдьар алгыстаах алаадьынан уонна «Нам кылыһах» төрүт дорҕоон бөлөҕө кырыымпаҕа доҕуһуоллаан ыһыах ыалдьыттарын көрүстүлэр.
Ыһыах саҕаланыыта нэһилиэктэр аҕа баһылыктарын кытары сэлэлии хааман киирдилэр. Эрэкэ-дьэрэкэ оҕолор хонуу устун сырсан үҥкүүлээн дайдылар. Түптэ буруотунан арчыһыт дьахталлар ыалдьыттары ыраастаатылар.
Ыһыах алгыһын Алгыс Бүөтүр, Владимир Сыромятников уонна Лоҥхо Тэтим Буурҕаат Уус уола түһэрдилэр. Сахалыы сиэринэн аал уот оттон, алгыс тыл этэн, алаадьылаах кымыһынан айах тутан күндүлээн Айыылартан көрдөстүлэр, ыһыах ыалдьыттарын алгыстаан ыраастаатылар.
Кымыс үрдүн охторуу сиэрэ-туома ыытылынна. Улуус нэһилиэктэрин аҕа баһылыктара Ытык дуоҕаны киллэрэн улуус баһылыгар Юрий Слепцовка туттардылар. Юрий Иннокентьевич Ытык дуоҕаны илиитигэр тутан ытык сэргэҕэ хороччу аста.
Кымыс үрдүн охторуу сиэрэ-туома ыытылынна. Улуус нэһилиэктэрин аҕа баһылыктара Ытык дуоҕаны киллэрэн улуус баһылыгар Юрий Слепцовка туттардылар. Юрий Иннокентьевич Ытык дуоҕаны илиитигэр тутан ытык сэргэҕэ хороччу аста.
Нам улууһун историятыттан биир үйэни сэгэтэн театрализованнай дьүһүйүү туруорулунна. Манна улууспут киэн туттар Улуу Убайдара, үлэһит-туруу дьоно, Албан ааттаах дьоруойдара ахтылыннылар.
Кэлбит ыалдьыттарга улуус баһылыга Юрий Слепцов, Ил Түмэн тыа хаһаайыстыбатыгар уонна аграрнай политикаҕа сис комитетын председателэ Александр Атласов, СР олохтоох бэйэни салайыныыга департаменын салайааччыта Иван Попов, улуус депутаттарын Сэбиэтин председателэ Алексей Винокуров, СР сэрии, үлэ, сэбилэниилээх күүстэр уонна быраабы араҥаччылыыр уорганнар ветераннарын общественнай тэрилтэлэрин председателэ Вильям Иванов, РФ Геройа Александр Колесов истиҥ эҕэрдэлэрин эттилэр.
Улуу Кыайыы 80 уонна Нам улууһа төрүттэммитэ 95 сылларыгар аналлаах «Кыайыы кынаттан, өрөгөй үктэллэн, туналыйар туонам – Эҥсиэлим хочото!» Үрүҥ Тунах Ыһыах үрдүк таһымҥа ыытылынна.
Дьон-сэргэ алгыстанна, арчыланна. Уруй-туску! Айхал-мичил!
