Ыам ыйын 24 күнүгэр оскуолаларга тиһэх чуорааннар чугдаардылар. Бу күн Намнааҕы народнай театрга эмиэ долгутуулаах. Ол курдук, И.С. Гаврильев аатынан Нам 1№ орто оскуолатын 11 кылааһын ситиһиилээхтиик түмүктүүр «Күндүл» литературнай театр артыыстарыгар нэһилиэнньэҕэ уус-уран самодеятельнас сайдыытын үлэтигэр көхтөөхтүк кыттан, Нам улууһун, Саха сирин үтүө ааттарын ааттатан, үрдүк ситиһиилэри аҕалан, историяны, үгэстэри киэҥ эйгэҕэ тарҕатыыга тус кылааттарын киллэрсибиттэринэн киэн туттан уонна махтанан туран, А.Ф. Шестаков аатынан Улуустааҕы норуот айымньытын Дьиэтин директора Константин Колодезников, Намнааҕы народнай театр режиссера Роман Герасимов махтал сурук, өйдөбүнньүк бэлэх уонна артыыс маастарыстыбатыгар үөрэммиттэрин туоһулуур суруктары үөрүүлээх быһыыга-майгыга туттардылар.
Ону сэргэ, Евдокия Степановна Гаврильева кылаас салайааччылаах оскуола 1996 сыллааҕы выпустара кэлэн ССРС үөрэҕириитин туйгуна, РСФСР норуотун үөрэҕириитин туйгуна, Нам улууһун Ытык Киһитэ Ульяна Александровна Сивцева аатынан стипендиялары «Күндүл» тоҕус уоланыгар туттардылар.
Намнааҕы народнай театр «Күндүл» литературнай-театральнай бөлөҕүн педагог-салайааччытыгар, И.С. Гаврильев аатынан Нам 1 № орто оскуолатын Саха тылын уонна литературатын учууталыгар Лариса Дмитриевна Даниловаҕа, талааннаах ыччаттарбытыгар Александра Алексееваҕа, Эльза Осиповаҕа, Сахалина Дьяконоваҕа, Дайаана Сивцеваҕа, Анастасия Ядрееваҕа, Олсена Слепцоваҕа, Амелия Дьяконоваҕа, Николина Семеноваҕа, Кристина Неустроеваҕа, Петр Азаровка, Кирилл Ядрихинскайга, Саргын Сергучевка, Денис Сокольниковка, Павел Шестаковка, Павел Прокопьевка, Герман Бугаевка, Айаал Захаровка чэгиэн доруобуйаны, туруоруммут соруктарын ситиһэллэригэр, инникитин даҕаны айар талааннарын сайыннаран, үөрэххэ-үлэҕэ өрүү көхтөөх буолалларыгар, төрөөбүт тылга уонна дойдуга, дьоҥҥо-сэргэҕэ уҕараабат тапталы, эрэллээх доҕоттору, сырдык санаа аргыстаах алгыстаах аартыктары баҕарабыт!
Эһиэхэ, көрөөччү уонна култуура диэйэтэллэрин үрдүк сыанабылларын, киэҥ биһирэбиллэрин ылбыт «Семинария паартатыттан Автономия трибунатыгар», «Туллуктай», «Блокада суруктара» испэктээкиллэр үтүө өйдөбүлү, умнуллубат кэмнэри хааллардылар диэн эрэнэбит.
