Кэрэ кэпсээн кэһиилээх, уйан музыка доҕуһуоллаах алыптаах Ырыа күнүнэн итии-истиҥ эҕэрдэ буолуохтун!
Саха сиригэр бу бырааһынньык 2013 сылтан СӨ култууратын Үтүөлээх үлэһитэ, композитор  Алексей Калининскай-Луҥха Өлөксөй көҕүлээһининэн олоххо киирэн киэҥник ыытыллар.

2017 с. ыам ыйын 8 күнүгэр СӨ Култуураҕа уонна духуобунай сайдыыга миниистирэ Владимир Тихонов Саха Өрөспүүбүлүкэтигэр Ырыа күннэрин тэрийэр туһунан 228 №-дээх бирикээһигэр олоҕуран, тустаах оробуочай бөлөх тэриллэн, Саха сиригэр Ырыа күнэ сыллата бэлиэтэнэр.
Бэлиэ күнү олохтуур туһунан 2022 сыллаахха ыам ыйын 20 күнүгэр Ил Дархан Айсен Николаев Ыйааҕа тахсыбыта уонна бу бырааһынньык суолтата судаарыстыбаннай таһымнаах буолбута. Сахабыт сиригэр 12-с төгүлүн Ырыа күнүн бэлиэтиибит.

Ыам ыйын 21 күнүгэр Максим Аммосов аатынан Нам киинин Кытылыгар эҕэрдэ кэһиилээх ырыа дьоро киэһэтэ буолан ааста. Тыыннаах доҕуһуолунан оскуола үөрэнээччилэрэ, араас идэлээх, дьарыктаах Нам улууһун олохтоохторо тус-бэйэлэрин айымньыларын, саха эстрадатыгар биллэр ырыалары толорон көрөөччүлэр биһирэбиллэрин ыллылар.
Ыам ыйынааҕы ылааҥы киэһэни Айхал Татаринов, Джулиана Иванова, Кристина Неустроева, Иван Милютин, Руслан Павлов, Татьяна Зырянова, Саяна Протопопова, кэргэннии Күннэй уонна Ньургун Федоровтар, Николай Протопопов, Ирина Винокурова, дьүөгэлиилэр Горьяна Стрекаловская уонна Сардаана Иванова, Анастасия Протопопова, Николай Уваров, Игорь Слепцов, Анна Яковлева, Алексей Дьячковскай, Юрий Иванов, Михаил Перетертов, Артем Тюкянов, Намина Жиркова, Николай Жирков, Юрий Сивцев, Иван Новиков, 

«Олох устун», «Махсыым уолаттара» уонна бу күн аан бастакын  сүрэхтэммит «Стажеры» вокальнай-инструментальнай ансаамбыллар чаҕылхай күннээх киэһэҕэ истиҥ уонна сырдык эйгэлээх ырыаларын бэлэхтээтилэр, ытыс дохсун тыаһынан айхалланнылар.
Ыытааччы Александр Дьяконов.

А.Ф.Шестаков аатынан Улуустааҕы норуот айымньытын Дьиэтэ бииргэ алтыһар айар куттаах доҕотторугар, ырыа ансаамбылларыгар, биир идэлээхтэригэр Саха сиригэр ЫРЫА КҮНҮНЭН өссө төгүл эҕэрдэлиир! Айар үлэҕитигэр баҕарабыт саҥа арыйыылары, алгыстаах аартыктары, өрүү  сырдык күн сардаҥалаах дьоллоох олоҕу! Инникитин даҕаны бииргэ айа-тута үлэлиэхпит, саҥа сүүрээннэри олоххо киллэрэн дьоҥҥо-сэргэҕэ үтүөнү түстүөхпүт!

Ырыа сайда, чэчирии турдун! Хас биирдиибитигэр умнуллубат түгэннэри бэлэхтээтин!
Кэлэри кэрэһэлиир кэнчээрилэрбит! Ыччат дьоммут! Ырыаны таптааҥ, сайыннарыҥ, саха ырыатын – саха кутун-сүрүн ымыытын харыстааҥ, сүппэттик үйэлээҥ!