Аҕа дойду сэриитигэр Улуу Кыайыы өрөгөйдөөх 80 сылын бэлиэтиир «НАМ УЛУУҺА КЫАЙЫЫ СУОЛУНАН» акция айана муус устар 4 күнүгэр Никольскай уонна Иккис Хомустаах нэһилиэктэригэр сырытта.
Никольскай нэһилиэгэ акция айанын кыттыылаахтарын И.С. Шарапов аатынан Сири оҥоруу музейыгар үтүө үгэскэ кубулуйбут итии каравайынан көрүстэ.
Музей сылын ахсын тубустар-тупсан, киһи элбэҕи билэн-көрөн тахсар улууспут киэн туттар тэрилтэтэ буолар. Директор Прасковья Протопопова Улуу Кыайыыга анаан туруорбут стендатын, экспонаттарын көрдөрөн, нэһилиэк туһунан кылгастык кэпсээтэ.
Айаҥҥа бааллар: А.Ф. Шестаков аатынан улуустааҕы норуот айымньытын дьиэтин былаанныыр-тэрийэр отделын сэбиэдиссэйэ, айан салайааччыта Туяра Петрова, Нам улууһун дьаһалтатын Пресс-киинин специалиһа Лариса Тимофеева, Движение Первых» Намнааҕы отделениетын специалистара Анна Ядрихинская, Сахаяна Васильева, А.Ф. Шестаков аатынан улуустааҕы норуот айымньытын дьиэтин «Коробейники нуучча ырыатын народнай ансаамбылын салайааччыта Дмитрий Барабанов, И.С. Гаврильев аатынан Нам 1№ оскуолатын 8 кылааһын үөрэнээччитэ Святослав Барабанов, П.И. Сивцев аатынан Намнааҕы история уонна этнография музейын Литературнай отделениетын сэбиэдиссэйэ Анна Николаева уонна А.Ф. Шестаков аатынан улуустааҕы норуот айымньытын дьиэтин методиһа Алтыына Шапошникова. Сыыдам сырыылаах УАЗ-пыт суоппара Сегей Орлов.
Айан программатын быһыытынан тэрээһиммит «Никольскай нэһилиэгэ» тыа сирин түөлбэтин муниципальнай тэриллиитин баһылыга Уйгу Сайаан Айхан Уола киирии тылынан саҕаланна.
Никольскай алын сүһүөх оскуолатын үөрэнээччилэрин толоруутугар «Ким да умнулубат, туох да умнуллубат!» хоһоонунан композицияны иһиттибит.
Саха саллаатын туос тууйаһыгар кэлэр кэскилгэ анаан, саха үтүө үгэһинэр аламаҕай алгыстаах, инникигэ сайдыы суолун тэлэргэ ытык сүбэлээх көмүс суругу нэһилиэк баһылыга акцияҕа туттарда, тэрээһин «Хайыһар» ырыа түмүктээтэ.
Салгыы, улууспут илин эҥэригэр турар Иккис Хомустаах нэһилиэгэр айаннаатыбыт. Күннээх ыраас халлаан арыаллаах сыыдам массыынабытыгар олорон аҕыйах мүнүүтэнэн нэһилиэк аартыгар тиийдибит. Манна бибилиотека, музей үлэһиттэрэ алгыстаах алаадьылаах, сахалыы таҥнан-симэнэн үөрэ тоһуйдулар. Аартыкка турар Мэҥэ тааска тохтоон, алаадьылаан, бу сиртэн Аҕа дойду сэриитигэр ыҥырыллан барбыт буойуттар, оччотооҕу олохтоох сорох ыалларыттан хастыы даҕаны эр дьоно барбыттарын туһунан кэпсээтилэр.
Сааскылыы сайаҕас салгыннаах бэс чагда устун айаннаах Иккис Хомустаах саҥа бөһүөлэгэ саҥа тутууларынан, тыргыллар асфальт суолунан көрсүтэ. Улуу Кыайыыга анаан тутуллубут сквергэ сырыттыбыт.
Ону сэргэ, Нам сиригэр нууччалар аан-маҥнай кэлэн острог туппут кэмнэриттэн саҕалаан муспут олус дириҥ историяны харайан турар музейы көрдүбүт.
Саҥа тутуллан дьэндэйбит култуура дьиэтэ сандааран, нэһилиэк кыратыттан аҕа саастаах ветераннарыгар тиийэ муспут. Манна эмиэ программабыт быһыытынан акциябыт тэрээһинэ ыытылынна. Олохтоох библиотека тэрээһиҥҥэ анаан кинигэ выставкатын туруорбут.
«Иккис Хомустаах нэһилиэгэ» тыа сирин түөлбэтин муниципальнай тэриллиитин баһылыгын солбуйааччыта Сергей Саввич Никонов тыл этэн тэрээһини арыйда, саха саллаатын туос тууйаһыгар инники көлүөнэҕэ анаан суругу туттарда.
Нэһилиэк олохтооҕо Мария Иванова «Ветераннар» ырыатынан эҕэрдэлээтэ, Саргылаана Попова оһуохай таһааран Улуу Кыайыыны уруйдаата. Айан кыттыылааҕа Лариса Тимофеева оскуола үөрэнээччититтэн интревью ылла.
Бу курдук, акциябыт төрдүс айана сааскы чаҕылхай күн аргыстаах түмүктэннэ.
