
Кулун тура 8 күнүгэр А.Ф. Шестаков аатынан Улуустааҕы норуот айымньытын дьиэтигэр сир симэхтэрэ кыргыттар, истиҥ ийэлэр, эйэҕэс эдьиийдэр, ытык эбээлэр ырыа бэлэх туттулар.
Сааланы толору мустубут көрөөччүлэр дохсун ытыстарын тыаһыгар улууспут кэскиллээх ырыаһыта Артем Тюкянов «Верни мне музыку» айар кэнсиэрин режиссер Анна Яковлева туруорда. Бииртэн-биир дууһаны манньытар ырыалардаах дьоро киэһэҕэ кыттыыны ыллылар: «Айылҕан» (салайааччы Мария Попова) уонна «Айледис» (салайааччы Римма Татаринова) үҥкүү ансаамбыллара , «Сардаана» мода-театра (салайааччы Надежда Стручкова), кырачаан артыыс Коля Кривошапкин, А.Ф. Шестаков аатынан УНАДь үлэһиттэрэ Туяра Петрова, Сахая Фадеева, Павел Винокуров, , доҕотторо Замир, Хоту Уолан, Афанасий Семенов.

Артем Николаевич Тюкянов Үөһэ Бүлүүттэн төрүүттээх Нам улууһун Нам сэлиэнньэтин олохтооҕо. «Сахатранснефтегаз» үлэһитэ, эдэр ыал амарах аҕата, тапталлаах кэргэнэ. Эппиэтинэстээх үлэтин таһынан спордунан уонна ырыанан дьарыктанар.
Нэһилиэк, улуус, өрөспүүбүлүкэ таһымыгар ыытыллар култуурнай-сырдатар үлэҕэ көхтөөх кыттааччылартан биирдэстэрэ. Артем Тюкянов Нам сиригэр кэлэн, Хабаровскайдааҕы култуура уонна искусства институтун выпускницата, ССРС култууратын туйгуна, СӨ култууратын үтүөлээх үлэһитэ, «Россия бастыҥ култуура үлэһитэ» Үрдүк бэлиэ хаһаайына, хормейстер Елена Александровна Кутукова салайааччылаах «Ньургуһун» народнай хорга солист быһыытынан дьарыктанан саҕалаан ырыа алыптаах эйгэтигэр киирбитэ, көрөөччү-истээччи сэҥээриитин ылбыта.

Өрөспүүбүлүкэҕэ ыытыллыбыт ырыа конкурстарыгар, фестивалларыгар кыттан саҕалаабыта.

Кэлин, М.П. Мусоргскай аатынан Уральскайдааҕы Государственнай консерватория выпускнигар, «Коробейники» нуучча ырыатын народнай ансаамбылын салайааччытыгар Дмитрий Николаевич Барабановка уһуйуллубута. Академическай толоруунан дьарыктанан, «Северный колорит» өрөспүүбүлүкэтээҕи фестивальга I истиэпэннээх Лауреат, «Золотой шлягер-2023» өрөспүүбүлүкэтээҕи конкурска Гран-при үрдүк сыанабылын туппута.

Бу курдук, Артем Тюкянов ырыа эйгэтигэр киирэн, бастакы айар киэһэтэ үрдү таһымҥа ааспытынан бар дьонугар махтанна. Чуолаан, Нам улууһун култуураҕа уонна духуобунай сайдыыга управлениетыгар (начальник Семен Ядрихинскай), А.Ф. Шестаков аатынан Улуустааҕы норуот айымньытын Дьиэтин коллективыгар (директор Константин Колодезников), И.Е. Винокуров аатынан Намнааҕы педагогическай колледж коллективыгар (директор Елена Никитина).
Ырыаһыт талааннаах Артем Николаевичка эҕэрдэ тиэрдэбит уонна айымньылаах үлэтигэр саҥа толоруулары, ситиһиилэри, тус олоҕор уонна дьиэ кэргэнигэр бары үтүөнү, дьоллоох олоҕу баҕарабыт.