«Төрөөбүт тыл, сурук-бичик күнүгэр аналлаах декада чэрчитинэн
научнай-практическай конференция»
Олунньу 21 күнүгэр М.К. Аммосов аатынан култуура уонна духуобунас сайдыытын дыбарыаһыгар, Төрөөбүт тыл, сурук-бичик күнүгэр аналлаах декада чэрчитинэн, научнай-практическай конференция буолан ааста.
Нэһилиэк баһылыктара, улуус уонна нэһилиэк сэбиэтин депутаттара, общественнай түмсүүлэр, култуура, үөрэх, спорт, тыа хаһаайыстыбатын салаатын үлэһиттэрэ, тэрилтэлэр салайааччылара, үлэһиттэрэ, урбаанньыттар, ыччаттар, ветераннар, олохтоох нэһилиэнньэ кыттыыны ыллылар.
Тэрээһин сүрүн соругунан — Нам улууһугар биир кэлим сахалыы иитэр-үөрэтэр, култуурнай эйгэни тэрийэр Кэнсиэпсийэ (2019-2023с.с.) олоххо киириитин дьүүллэһии уонна саха тылын, литературатын, төрүт култуура учууталларын II-с Сийиэстэрин Уураахтарын олоххо киллэриигэ инники үлэни торумнааһыҥҥа олоҕурда.
Туһааннаах сорук чэрчитинэн санааларын, үлэ барылын туһунан Саха Өрөспүүбүлүкэтин Ил Дарханын уонна бырабыыталыстыбатын Тыллар сайдыыларын салалтатын салайааччыта, филологическай наука кандидата — «Саха Өрөспүүбүлүкэтин тыл бэлиитикэтин туһунан» Римма Романовна Жиркова иһитиннэрдэ. Ону сэргэ, «Нам улууһа» МТ баһылыга Ю.И. Слепцов, «Нам улууһа» МТ баһылыгын солбуйааччыта П.В. Абрамов, «Партизан нэһилиэгэ» МТ баһылыга А.Н. Зырянов, Нам улууһун Култуураҕа уонна духуобунас сайдыытын салалтатын начальнига С.П. Ядрихинскай, Нам улууһун Үөрэҕин салаатын начальнига Е.В. Ядреева, Нам улууһугар Олоҥхо ассоциациятын эппиэттээх сэкэрэтээрэ С.Н.Лукина, И.Е.Винокуров аатынан Намнааҕы педагогическай колледж уһуйааччыта П.Д. Байанаева, П.П. Ядрихинскай-Бэдьээлэ аатынан Олоҥхо дьиэтин директора В.В. Колпашникова, Тыа хаһаайыстыбатын салаатын начальнигын солбуйааччыта Ю.В.Петров, Хатын-Арыы нэһилиэгин И.Е.Винокуров аатынан история уонна кыраайы үөрэтэр музей директора А.Х. Христофоров, «Мой бизнес» киин салайааччыта М.С. Тарабукина эттилэр. Научнай-практическай конференцияны «Нам улууһа» МТ баһылыгын социальнай үлэҕэ солбуйааччыта М.С. Игнатьева иилээн-саҕалаан ыытта.
Бу күн, Н.М. Рыкунов аатынан Улуустааҕы Киин библиотека, Дьокуускайтан «Айар» (Бичик) кинигэ тэрилтэтэ, «Кэрэ» ателье, олохтоох маҕаһыын «Уран Саргы» выстапката, атыыта турда.
