«Күн оһуохайа» өрөспүүбүлүкэтээҕи телевизионнай күрэххэ Саха сирин улуустарыттан ыччат дьон уонна саха төрүт үҥкүүтүн тарҕатааччы идэлээх култуура үлэһиттэрэ кытта сылдьаллар. Намтан Вера Прокопьевна Цыпандина сүүмэрдэммит бөлөҕү кытта үлэлэһэ сылдьар уонна олунньу 7 күнүгэр «Саха» НКИХ  «Эйгэ» биэриитигэр кытынна.

Олунньу 7 күнүгэр Дархан оһуохайдьыттар кэлэннэр маастар кылаастарыгар сырыттылар. Вера Прокопьевна бөлөҕөр Сунтаартан Марина Хомподоева сырытта.

Олунньу 8 күнүгэр  иккис түһүмэх буолла.  Манна Таатта, Үөһэ Бүлүү, Амма,Чурапчы, Нам искусство оскуолатын оҕолорун уруһуйдарыттан наставник талан ылбыт хартыынатын кыттааччы оҕолор тутатына хоһуйууга холоннулар.  Иккис түһүмэх түмүгүнэн өссө биир кыттааччы бөлөхтөн тахсан кынатчыттарга кыттыста.  

Өрөспүүбүлүкэтээҕи оһуохай этээччи ыччат бөлөҕөр наставниктыы сылдьар биир идэлээхпит Вера Цыпандина: «Бу күн проект «Ыалдьыт» рубрикатыгар СӨ бырабыыталыстыбатын бэрэссэтээтэлин солбуйааччы  Сергей Васильевич Местников, СӨ култуураҕа уонна духуобунай сайдыыга Миниистирэ Афанасий Иванович Ноев, «Саха» НКИХ генеральнай директора  Олег Олегович Марков, «Саха» НКИХ директора, «Саха» НКИХ ханаалларын дирекциятын Сүрүннүүр редактора  Олег Егорович Колесов-Талбан ыалдьыттаатылар. Кинилэр оҕолору кытта атах тэпсэн олорон кэпсэтэн, араас улуус оһуохайын сэҥээрэ иһиттилэр. Киэһээ «Айархаан» бөлөх солистката Нарияна Ренанто кэлэн хомус аптаах дорҕоонун иһитиннэрэн, түһүмэх түмүктүүр чааһын киэргэттэ» — диэн иһитиннэрэр. 

Үһүс түһүмэххэ оҕолор 15 тиэмэттэн талан тута хоһуйдулар. Бу түһүмэх түмүгүнэн Вера Прокопьевна бөлөҕөр икки оҕо кыттааччы хаалла.

 Төрдүс түһүмэх — өс хоһоону тута хоһуйууга ананна. Манна  дьүүллүүр сүбэ кэлэн иһиттэ, сыаналаата.
Түмүктүүр түһүмэх «Саха» НКИХ быһа эпииригэр ыытылынна.  Вера Цыпандина уһуйар кыттааччыта Милана Михайлова финалга киирэн «Кылыгырас кылыһахтаах кыттааччы» анал аат иҥэрилиннэ уонна харчынан бириэмийэни тутта.  Кристина Матвеева Үөһэ Бүлүү улууһун оһуохайдьытын стипендиятын тутта.

«Бу курдук 10 күммүт олус тэтимнээхтик биир тыынынан бүтэн хаалла. Көстөөх сиртэн иһиллэр «Күн Оһуохайа» бырайыакка кыттыбыт дьоллоохпун!» — диэн наставник быһыытынан кыттыбыт биир идэлээхпит Вера Прокопьевна Цыпандина үөрүүтүн үллэстэр.