Сэтинньи 25 күнэ — Олоҥхо күнэ.  Саха норуотун уус тылынан баай Улуу Олоҥхото ЮНЕСКО ылыммыт эбийиэктэрин тиһигэр 2005 сыллаахтан киирбитэ.  

Өбүгэлэрбит улуу айымньыларын, олоҥхоҕо хаалларбыт мындыр өйдөрүн кэнчээри ыччаттарга тириэрдэр соруктаах, Нам улууһун «Эҥсиэли оһуокайа» түмсүү  салайааччыта, Саха өрөспүүбүлүкэтин үтүөлээх оһуокай этээччитэ, ыччат муҥха олоҥхотун муҥутуур кыайыылааҕа, А.Ф. Шестаков аатынан Улуустааҕы норуот айымньытын Дьиэтин үлэһитэ, «Дьэргэлгэн», «Ай-тыл» айар бөлөхтөр салайааччыта Вера Цыпандина-Харыстаана «Олоҥхо омоон суолунан» бырайыагынан айаҥҥа сырытта. Ол курдук, Нам улууһун Үөдэй нэһилиэгин олохтоохторугар олоҥхолоон, көрөөччүлэр сөҕө-махтайа сэҥээриилэрин ылла.  

Салгыы, Ф.И. Авдеева аатынан Дьокуускайдааҕы оҕо айымньытын дыбарыаһыгар олоҥхо декадатын чэрчитинэн киэҥ тэрээһиҥҥэ өбүгэлэрбит улуу айымньыларын, олоҥхоҕо хаалларбыт мындыр өйдөрүн кэнчээри ыччаттарбытыгар тириэрдэр сыаллаах Былатыан Ойуунускай «Дьулуруйар Ньургун Боотур» олоҥхотугар олоҕурбут, Эллэй Сивцев ойууларынан «Уран ойуу» иитиллээччилэрин үлэлэрин быыстапката үөрүүлээхтик  арылынна (сал. Максимова Э.А.). Оҕолор олоҥхо үс дойдутун бүтүннүү, орто дойду кэрэтин, саха кыыһын толору симэҕин, бухатыыр уобараһын толору арыйан ойуулаабыттара сөхтөрдө.
Салгыы 4 «а»  кылаас оҕолоругар анаан (сал. Павлова М.С.) «Олонхо дойдутугар айан» кылаас чааһа олус тэрээһиннээхтик ааста. Вера Цыпандина-Харыстаана кэрэ кэпсээн кэһиитин, олоҥхо тойугун бука бары олбохторугар  чуумпуран олорон иһиттилэр. Маны таһынан кылыһах таһаарар маастар-кылааһыгар көхтөөхтүк кытыннылар.

Олоҥхону сэҥээрээччилэр күнтэн-күн үксээн иһэллэрэ үөрдэр. «Олоҥхо омоон суолунан» бырайыак иккис күнүгэр Вера Цыпандина-Харыстаана Дьокуускай куорат 17-с нүөмэрдээх орто оскуолатыгар ыалдьыттаата уонна Нам олоҥхоһута Егор Герасимович Охлопков-Буоратай «Алантай Боотур» олоҥхотун толорон иһитиннэрдэ. 

Бырайыак үһүс күнүгэр Сахаайа Колодезникова кыттыылаах Көбөкөн нэһилиэгэр  хомуска оонньооһун маастар-кылааһын ыытылынна уонна олоҥхоттон толорон, уһуйаан оҕолорун кытта оскуола үөрэнээччилэригэр иһитиннэрдэ.

Төрдүс күн Вера Цыпандина-Харыстаана Бөтүҥ нэһилиэгин орто оскуолатыгар салайар «Дьэргэлгэн» оҕо фольклорнай бөлөҕүн илдьэ сырытта. Манна Карамзина Амаана чабырҕах, кырачаан Элла «Соноҕос» норуот ырыатын ыллаан бэлэх ууннулар.

Карамзина Сигуна, Мордовской Юра оҕолорго олоҥхолоон иһитиннэрдилэр.

Бэһис күн Намнааҕы кииннэммит оҕо библиотечнай тиһиккэ Нам 2№ оскуолатын 5-с кылааһыгар иһитиннэрдилэр.

Салгыы, И.Е. Винокуров аатынан Намнааҕы педагогическай колледж студеннарыгар,  Модут, Бөтүҥ улахан дьонуга олоҥхону толорон иһитиннэрдэ.