Дойдуга Дьиэ кэргэн сылынан уонна Ийэ күнүн көрсө сэтинньи 20 күнүгэр истиҥ ийэлэргэ сүгүрүйүү бэлиэтэ буолар үөрүүлээх тэрээһин буолла.
Үлэ ветерана, «Отуу уота» айааччыларыттан биирдэстэрэ, «Иэйии» ветеран кулуубун чилиэнэ, сэрии сылын оҕото Варвара Куприяновна Попова-Талаһалаах Кыыһын дьон-сэргэ айхаллыы көрүстэ. Улууспут Ытык киһитин оҕолоро, сиэннэрэ, хос сиэннэрэ кэлэн эҕэрдэлээн, сибэкки дьөрбөтүн туттаран, ырыа-тойук бэлэхтээтилэр. Варвара Куприяновна республикаҕа социальнай-экономическай сайдыытыгар кылаатын, көхтөөх общественнай үлэтин иһин «Саха Өрөспүүбүлүкэтин бочуоттаах Ытык кырдьаҕаһа» бэлиэнэн наҕаарадаланна.
«Нам улууһа» муниципальнай тэриллии баһылыга Юрий Иннокентьевич Слепцов олохтообут «Бастыҥ ийэ» анал бириэмийэтэ Нам улууһун общественнаһыгар көхтөөх кыттыыны ылар, улахан дьиэ кэргэттэр ытык ийэлэргэр туттарылынна.
Истиҥ таптал уйалаах улахан дьиэ кэргэттэр Күн тэҥэ күндү ийэлэригэр ис сүрэхтэн иһирэх эҕэрдэ! Өрүү сылаас мичээргит сандаара туруохтун, тулалыыр чугас дьоҥҥут ытыктабылыгар сылдьан чэгиэнник олоруҥ!
