А.Ф.Шестаков аатынан Улуустааҕы норуот айымньытын дьиэтэ Нам улууһун олохтоохторун саҥа үөрэх, үлэ дьыла саҕаламмытынан эҕэрдэлиир уонна бу үүммүт кэм саҥа арыйыылары, саҥа ситиһиилэри аҕаллын диэн баҕа санаатын тиэрдэр.
2024 сыл сайына Нам улууһугар олус сэргэхтик, араас тэрээһиннэринэн дьону-сэргэни аралдьытта. Ол курдук, Амма улууһугар ыытыллыбыт Өрөспүүбүлүкэтээҕи олоҥхо ыһыаҕын, Үс Хатыҥҥа ыытыллыбыт Улуу Туймаада ыһыаҕын төрүт үгэскэ күрэхтэрин, Саха сирин үөрэнээччилэрин II-с спартакиадатын кыайыылаахтарын чиэстээтибит.
Ону сэргэ, атырдьах ыйыгар «Эҥсиэли» култуура уонна сынньалаҥ пааркатыгар Саха сирин оскуолаларын 1977-1994 с.с. бүтэрбит выпустар Бастакы култуурнай-спортивнай спартакиадалара үрдүк таһымҥа ыытыллан ааста. Манна араас сыллардааҕы выпустартан 17 хамаанда көрсөн, умнуллубат үс күнү атаарда.
Үгэс быһыытынан күүтүүлээх Атырдьах ыйынааҕы мунньах Нам улууһун үөрэҕириитин бары үлэһиттэрин түмтэ.
Билии күнүнэн Нам киинин оскуолаларын маҥнайгы кылааска киирбит кырачаан үөрэнээччилэрин эҕэрдэлиир үөрүүлээх чаас ыытылынна.
Об авторе
