Кулун тутар 16 күнүгэр, Нам улууһун оҕо модельнай библиотекатын көҕүлээһининэн, 16-с төгүлүн ыытыллар «Уоланнар ааҕыылара» уус-уран айымньыны дорҕоонноохтук ааҕыыга күрэх түмүктэннэ. Быйылгы күрэх Саха биллиилээх поэта, тылбаасчыта, биир дойдулаахпыт Илья Дорофеевич Винокуров-Чаҕылҕан төрөөбүтэ 110 сылыгар ананна. Манна өрөспүүбүлүкэбит араас муннуктарыттан детсад иитиллээччилэриттэн саҕалаан оскуола улахан кылаастарын үөрэнээччилэрэ И.Д.Винокуров-Чаҕылҕан айымньыларынан кытыннылар.
Дьүүллүүр сүбэ түмүгүнэн, Намнааҕы народнай театр «Күндүл» литературнай-театрализованнай коллективын кыра бөлөҕө, 7-тэн 12-гэр диэри саастаах уолаттар ортолоругар, I истиэпэннээх дипломунан уонна сыаналаах сертификаатынан наҕараадаланна.
Оҕолорбутугар — «Күндүл» кыра бөлөҕөр, төрөппүттэргэ, педагог-салайааччыга Лариса Даниловаҕа (И.С. Гаврильев аатынан Нам 1№ орто оскуолатын Саха тылын уонна литературатын учуутала), ийэ тылынан Саха суруйааччыларын айымньыларын уус-ураннык ааҕарга уһуйар, сценаҕа тутта-хапта сылдьарга үөрэтэр Намнааҕы народнай театр режиссеругар Роман Герасимовка үрдүк ситиһиилэринэн эҕэрдэ!
