Олунньу 10 күнүгэр, Нам улууһун Хатырык нэһилиэгэр саҥа улахан объект үлэҕэ киирдэ. Ол курдук, нэһилиэнньэ өр күүппүт М.К. Аммосов аатынан култуура уонна спорт элбэх хайысхалаах киинэ Өрөспүүбүлүкэбит Ил Дархана кыттыылаах үөрүүлээх арыллыыта ыытылынна. «Сайдам» норуот айымньытын дьиэтэ, библиотека, Н.Н. Атласов аатынан Оҕо искусстватын оскуолата, спортивнай комплекс, биир дьиэ кэргэн курдук, саҥа кииҥҥэ хас биирдии кэлбит ыалдьыты үөрэ көрүстүлэр.
Киэһээҥи программатыгар Намнааҕы народнай театр «Семинария паартатыттан Автономия трибунатыгар» саха норуота өлбөт-симэлийбэт дьолугар төрөөбүт киэн туттар Чулуу Уолаттарбыт тустарынан архивнай докумуоннарга олоҕурбут испэктээкили көрдөрөн, тэрээһин суолтатын өссө чиҥэттэ, көрөөччүлэри долгутта, сүргэлэрин көтөхтө.
