А.Ф. Шестаков аатынан Улуустааҕы норуот айымньытын дьиэтэ, үгэс курдук, Саҥа Дьыллааҕы өрөбүл күннэрин дьон-сэргэ сынньалаҥын тэрийиитигэр анаата.
Ол курдук, Ахсынньы 31 күнүттэн саҕалаан, биир да күн өрөөбөккө, нэһилиэнньэ сааланы толору кэлэн сэргэхсийдэ, саҥа сылга саҥа күүс-уох ылла, өр көрсүбэтэх биир дойдулаахтарыныын, үөлээннээхтэриниин алтыста.
Киириигэ Саха Өрөспүүбүлүкэтин култууратын туйгуна, өр сыл худуоһунньугунан үлэлээбит Нам улууһун култууратын Бочуоттаах ветерана, талааннаах ытыктыыр киһибит Максим Кириллович Аргунов папье-маше ньыматынан оҥорбут кырачаан Луочаана хас биирдии кэлбит ыалдьыты Саҥа Дьылынан эҕэрдэлии көрүстэ.
Вестибюльга дьэрэкээнник киэргэммит харыйаҕа саҥа үүммүт сыл бэлиэтэ буолар Луо, Саҥа Дьыллааҕы сиэдэрэй фотозона таһыгар көрөөччүлэрбит аймах-билэ дьоннорун, доҕотторун кытта хаартыскалаан, үөрүүлээх көрсүһүүлэрин үйэтиттилэр.
Бииртэн-биир сонун тэрээһиннэр кыттааччыларын хас биирдии сценаҕа тахсыыларын көрөөччүлэр хабыллар ытыс тыаһынан көрүстүлэр, айар куттаах артыыстары кынаттаатылар. Сүгүрүйээччилэр артыыстары кытта хаартыскаҕа түстүлэр, үтүө тыллаах баҕа санааларын сурукка тистилэр.
Бу курдук, А.Ф. Шестаков аатынан Улуустааҕы норуот айымньытын дьиэтэ кырачааннартан саҕалаан ытык саастаах көрөөччүлэригэр ыллам ырыалардаах, дьэрэкээн үҥкүүлэрдээх, көрдөөх кэпсээннэрдээх дьоро киэһэлэри бэлэхтээтэ.
