Ахсынньы 8 күнүгэр, А.Ф. Шестаков аатынан Улуустааҕы норуот айымньытын дьиэтигэр, Дойдуга Педагог уонна наставник сылын түмүктээн, З.П. Винокуров аатынан Намнааҕы оҕо искусстватын оскуолатын преподавателя Ксения Ивановна Колодезникова айар выставката үөрүүлээх быһыыга-майгыга арылынна. Тарбаҕар талааннаах, ойуулуур-дьүһүннүүр эйгэҕэ үрдүк таһымнаах үлэлэрдээх Ксения Ивановна бу выставкаҕа тус оҥоһуктарын таһынан, оҕоҕо кэрэни кэрэхсэтэр үлэтигэр араас сылларга дьарыкаммыт выпускниктарын үлэлэрэ көрдөрүүгэ турдулар.
Выставкаҕа кэлбит ыалдьыттары, көрөөччүлэри Ксения Ивановна мэтириэтэ хартыыналаах мольберт көрүстэ. Манна ким баҕалаах араас киистэнэн кыраасканы ылан мэтириэккэ «суруйдулар».
Ол кэннэ, күннээҕи үөрэх кэмин араас түгэннэриттэн хаартыскалар иккис этээскэ фойеҕа арыаллаатылар.
З.П. Винокуров аатынан Намнааҕы оҕо искусстватын оскуолатын преподавателлэрин народнай инструменнарын оркестра (сал. Анна Федулова) классическай музыканан доҕуһуоллаан киэргэттэ.
Иккис этээс тухары киһи хараҕа хайгыы көрөр уран үлэлэр тэнийэ тардыллыбыттар.
Араас сылларга дьарыктаан таһаарбыт үөрэнээччилэрин үлэлэрэ кэлбит эрэ киһи сүрэҕин-быарын ортотунан киирдилэр. Выпускниктар кырачаан тарбахчааннарынан ойуулуур-дьүһүннүүр эйгэҕэ уһуйуллан, араас күрэхтэргэ кыттан, улууска, өрөспүүбүлүкэҕэ үрдүк ситиһиилэри аҕалан, билигин номнуо идэтийбит худуоһунньуктар, фотографтар, таҥас-сап, интерьер эйгэтин дизайнердара буолаллар.
Эбии үөрэхтээһин оскуолата киһини личность быһыытынан иитэн-такайан таһаарара, эбии үөрэхтээһин эйгэтигэр үлэлиир энтузиаст-педагог кыһамньытынан оҕо олох киэҥ аартыгар идэни таба талыытыгар сүҥкэн кылааттааҕын бу искусства оскуолатыгар дьарыктанан, чочуллан тахсыбыт выпускниктар ситиһиилэрэ бигэргэтэллэр.
Түгэнинэн туһанан, өссө төгүл, айар үлэбитигэр бииргэ алтыһар биир идэлээхпитин, талааннаах Наммыт олохтооҕун Ксения Ивановнаны ис сүрэхтэн эҕэрдэлиибит. Идэҕэр бэриниилээх буолаҥҥын, ис дууһаҕыттан оҕо айар дьоҕурун сайдыытыгар, Култуура уонна искусства эйгэтигэр сүҥкэн кылааккын киллэрсэ сылдаргынан киэн туттабыт уонна инникитин өссө айымньылаах үлэни, саҥа ситиһиилэри баҕарабыт!
