От ыйын 1 күнүгэр Нам улууһугар Бойобуой дьайыы ветераннарыгар анаммыт сквергэ бүгүҥҥү дириҥ суолтаах күн бэлиэтэннэ.
Ол курдук, Ил Дархан ыйааҕынан от ыйын 1 күнүн — Бойобуой дьайыы ветераннарын күнүнэн биллэрбитэ.
Бэлиэ күн тэрээһинин Үлэ ветерана, «За воинскую доблесть» мэтээл кавалера, Сэбиэскэй аармыйа гвардиятын капитана, Саха Өрөспүүбүлүкэтин Бэчээтин туйгуна, Нам улууһун Партизан, Бастакы Хомустаах уонна Кэбээйи улууһун Сииттэ нэһилиэктэрин Ытык Киһитэ, Аҕа көлүөнэ бойобуой Албан ааттаах суолларын чиэстээхтик салҕааччылартан биирдэстэрэ Иннокентий Иванов ырыатынан саҕалаата.
Бу дириҥ суолталаах бэлиэ күҥҥэ кэлбит кыттааччылар, анал сорудахха сылдьан суорума суолламмыт уолаттарбытын ахтан-санаан ааһар түгэммитигэр биир мүнүүтэҕэ иһийэн турдулар, тыыннаах сибэкки дьөрбөтүн уурдулар.
Кыттыыны ыллылар: Нам улууһун баһылыга Юрий Иннокентьевич Слепцов, Ленскэй нэһилиэк баһылыгын солбуйааччыта Тимофей Егорович Охлопков, Нам улууһун «ВОИН» түмсүү салайааччыта Павел Николаевич Оконешников.
Тэрээһин Николай Протопопов Анал байыаннай дьайыыга сылдьар байыастарга анаммыт ырыатынан түмүктэннэ.
Ийэ дойдуга иллээх олох туһугар сырдык тыыннарын толук уурбут буойуттарбыт ааттара ахтылла турдуннар.
