Ийэ дойдутугар иэһин толорбут
Хорсун санаалаах саллаат доҕорбут —
Килбиэн кыайыыта умнуллуо суоҕа!
Бэс ыйын 22 күнүгэр Арассыыйа үрдүнэн — кутурҕан уонна кэриэстэбил күнэ буолла.
1941 с. хас биирдии дьиэ кэргэни уоттаах сэрии ыар тыына таарыйбыта. Сэрии содула ынырык сыыппаралар: аҥардас сэрии хонуутугар Сэбиэскэй аармыйа 8 мөл. тахса саллаат тыына быстыбыта…
Нам оройуонуттан 2651 киһи, 10 ыалтан 5-тии, 33 ыалтан 3-түү, 80 ыалтан 2-лии бииргэ төрөөбүт уолаттар сэриигэ аттаммыттара. Сэрии кутаа уотун ааһан Берлин куоракка диэри тиийбиттэрэ, дьоппуон милитаристарын үлтүрүтүүгэ кыттыбыттара. 1508 буойун сэрии хонуутугар геройдуу охтубута, 1143 киһи сэрииттэн эргиллибитэ.
Тыылга хаалбыт кырдьаҕастар, оҕолор, ийэлэр бэриниилээх, сыралаах үлэлэринэн Улуу Кыайыыны уһансыбыттара. Төрөөбүт дойдуларыгар төннөн кэлбит саллааттар эйэлээх олоҕу тутуспуттара. Ол кэмтэн ыла номнуо 82 сыл ааста…
Нам улууһугар Аҕа дойдуну көмүскээччилэр кэриэстэригэр ананар тэрээһин Кыайыы скверигэр ыытылынна.
Бу күн оҕо лааҕырдарыгар сылдьар кэнчээри ыччаттарбыт, «Нам улууһа» МТ баһылыга Юрий Иннокентьевич Слепцов, «Нам улууһа» МТ депутаттарын Сэбиэтин председателэ Алексей Иванович Винокуров, «Нам улууһа» МТ ветераннарын Сэбиэтин председателэ Софья Дмитриевна Кобякова, «Ленскэй нэһилиэк» МТ баһылыгын солбуйааччыта Тимофей Егорович Охлопков, Тыыл ветерана, «Гражданская доблесть» РФ орденын хаһаайына, РФ үөрэҕэриитин туйгуна, СӨ Үтүөлээх учуутала, Нам улууһун, 2-Хомустаах нэһилиэгин Ытык киһитэ Иннокентий Никитич Готовцев уонна М.К. Аммосов аатынан Хотугулуу-илиҥҥи федеральнай университет устудьуона Уххан Протопопов кэриэстэбил тылларын эттилэр.
Петр Одорусов тылларыгар, Николай Бойлохов мелодиятыгар «Тыыннаахтар умнубат сыллара» ырыанан саҕаланна. Ырыаны Үлэ ветерана, «За воинскую доблесть» медаль кавалера, Советскай Армия Гвардиятын капитана, СӨ бэчээтин туйгуна, Партизан, 1-Хомустаах уонна Сииттэ нэһилиэктэрин Ытык киһитэ Иннокентий Иннокентьевич Иванов толордо.
Мүнүүтэ устата чуумпуран туран, кэриэстээһин мүнүүтэтэ биллэрилиннэ.
Бу күн бары курутуйабыт. Курутуйабыт алаһа дьиэтигэр төннүбэтэх саллаакка, курутуйабыт сэрии аччык сылларыгар суорума суолламмыттарга, курутуйабыт оҕолорун сүтэрбит ийэлэргэ-аҕаларга, курутуйабыт дьоллоох оҕо саастарыттан маппыт оҕолорго…
Ким да умнуллубат, туох да умнуллубат!
