Күндү Наммыт нэһилиэгин кырачаан олохтоохторун, төрөппүттэри бүгүҥҥү үөрүүлээх бырааһынньыгынан — Аан дойдутааҕы оҕо көмүскэлин күнүнэн итиитик-истиҥник эҕэрдэлиирбит!
Оҕо көмүскэлин Аан дойдутааҕы күнэ 1949 сыллаахха, сэтииньи ыйга дьахталлар Аан дойдутааҕы демократическай федерацияларын сэбиэтин сессиятыгар олохтоммута уонна сыл аайы бэс ыйын 1 күнүгэр бэлиэтэнэр буолбута.
Бэс ыйын 1 күнүгэр күндээрэр оҕо саас үөрүүлээх бырааһынньыга киэҥ далааһыннаахтык ааста. Сарсыардаттан оҕо аймах чаҕаарар саҥатынан Нам киинэ туолла. Ону сэргэ оҕолорго анаан араас аттракционнар, маастар-кылаастар, оонньуулар, минньигэс атыы эгэлгэтэ болуоссаты толору тэлгэннэ.
М. К. Аммосов аатынан Киин болуоссакка «Кустук өҥнөөх оҕо саас» бырааһынньыкка Ленскэй нэһилиэгин «Солнышко», «Кустук», «Кэнчээри», Чэчир», «Кэскил», «Кыталык», «Туллукчаан», «Көлүкэчээн», «Чуораанчык», «Теремок», «Сулусчаан» оҕо саадтара сиэдэрэйдик симэнэн, араас сибэкки, от-мас, көтөр, айылҕа көстүүтүн дьүһүйэн, анаан-минээн оҥостон кэлбиттэрэ олус үөрдэр.
И.С. Гаврильев аатынан Нам 1№ орто оскуолатын үөрэнээччилэрин Полицейскай этэрээтэ, «Күндүл» уус-уран ааҕыы бөлөҕө, Нам 2№ орто оскуолатын үөрэнээччилэрин медик-волонтердара, «Полярная звезда» поисковай этэрээтэ, Н.С. Охлопков аатынан улуустааҕы Гимназия үөрэнээччилэрин «Орлята» этэрээтэ бары анаан фомалаах, былаахтаах сомоҕолуу хаамсан киирбиттэрэ көрүөхтэн кэрэ буолла.
Үөрүүлээх чааһы «Нам улууһа» МТ баһылыга Ю.И. Слепцов, «Нам улууһа» МТ депутаттарын Сэбиэтин председателя А.И. Винокуров, «Ленскэй нэһилиэк» МТ баһылыгын солбуйааччы Т.Е. Охлопков, бырааһынньыгынан уонна сайыҥҥы сынньалаҥ саҕаламмытынан эҕэрдэлээн арыйдылар.
«Крокодил Гена и его друзья» мультфильм геройдара Чебурашка, Крокодил Гена уонна Шапокляк («Кыталык» оҕо саадын педагогтара) детсад оҕолоро кыттыылаах «Пусть всегда будет солнце!» кэнсиэри ыыттылар.
Мультик геройдара Винни Пух, Пятачок уонна Кролик буоланнар көрү-нары көҕүлүттэн тутан оҕолору үҥкүүлэттилэр.
«Оһуор үҥкүүтэ Оһуокай» оҕолорго күрэххэ кырачааннар холонон көрдүлэр, саастыылаахтарын кытта күөн көрүстүлэр. «Маанылаах таҥас» конкурс-дефилеҕа кырачааннар сахалыы мааны таҥастарын көрдөрдүлэр, симэхтэрин биһирэттилэр.
Өркөн өй аргыстаах Өрөспүүбүлүкэтээҕи Историко-юридическай олимпиада кыайыылаахтарын уонна призердарын чиэстээһин буолла. Манна И.С. Гаврильев аатынан Нам 1№ орто оскуолатын, Н.С. Охлопков аатынан улуустааҕы Гимназия уонна В.П. Артамонов аатынан Хамаҕатта Саха-Французскай лицейын 11 кылаас үөрэнээччилэригэр Нам улууһун прокурора, Юстиция сүбэһитэ А.А. Яковлев уонна прокурор старшай көмөлөһөөччүтэ, 3-с кылаастаах юрист Л.А. Антонова эҕэрдэлээтилэр, дипломнары, өйдөбүнньүк бэлэхтэри туттардылар.
Киэһэтин А.Ф. Шестаков аатынан Улуустааҕы норуот айымньытын дьиэтигэр Хатырык нэһилиэгин «Сайдам» норуот айымньытын дьиэтин үлэһиттэрэ араас оонньуулары ыыттылар, контактнай зоопаркаҕа куһу, козаны, кролигы, попугайдары, кутуйахчааны аҕалан ыалдьыттаттылар. Оҕо күн сиригэр дьоллоох буоллун диэн туран, «Эрэли бэлэхтээ» эстрада сулустара уонна Нам улууһун уус-уран самодеятельнаһа кыттыылаах аһымал-кэнсиэр бүгүҥҥү күнү түмүктээтэ. Кэнсиэртэн киирбит үп барыта кырачаан Дьулус Винокуров улахан ыарыыттан эмтэнэ барарыгар көмө буолан, төрөппүттэригэр туттарылынна.
Салҕыы, тэрээһинтэн хаартыскалар:
Күндү оҕолор! Ийэ-аҕа тапталынан угуттанан дьоһун дьон буола улаатыҥ! Эһиги үрдүгүтүгэр куруутун сырдык күн сыдьаайа тыктын, ыраас халлаан көҥүл туонатыгар эһиги чуопчаарар саҥаҕыт чугдаардын!
Кырачаан киһи сайдыылаах, күүстээх киһи буола улаатарыгар, оҕо саас дьоллоох түгэннэрин бэлэхтиир, оҕо оскуолаҕа киирэригэр билии-көрүү маҥнайгы укулаатын уурсар, оскуола сылларын тухары арыаллаан, иитэн-такайан таһаарар убаастабыллаах педагогтарбыт бу дьаныардаах үлэҕитин үрдүктүк сыаналыыбыт.
Барыгытыгар чэгиэн доруобуйаны, үрдүк ситиһиилэри, толору дьолу баҕарабыт!
