Ыам ыйын 21 күнэ – Саха Сиригэр Ырыа күнэ! Бэлиэ күнү олохтуур туһунан 2456 № Ыйааҕыгар Ил Дархан Айсен Николаев 2022 сыл ыам ыйын 20 күнүгэр, илии баттаабыта. Онон «Бу бырааһынньык статуһа судаарыстыбаннай таһымнаах буолла» — диэн ырыа айааччылар, ырыаны көҕүлээччилэр, ырыаны таптааччылар үөрүүлэрин үллэстэллэр.
Ырыа күнүн чэрчитинэн араас тэрээһиннэр кэмэ суох ыытыллаллар.
Быйылгы сылга Нам киинигэр М.К. Аммосов аатынан болуоссат «Кытылыгар» долгуннурар гитара дорҕоонноох, баян матыыптаах, фортепиано доҕуһуоллаах ырыа киэһэтэ ыытылынна. Көй салгыннаах аһаҕас халлааҥҥа бииртэн-биир ураты иэйиилээх, олоҕу, тапталы туойар ырыалар ылланнылар. Ылбаҕай ырыа үйэлэр тухары ылланан, дьон-сэргэ санаатын көтөҕөн, биир сомоҕоҕо түмэр тыыннаах доҕуһуол кэнсиэрин А.Ф. Шестаков аатынан Улуустааҕы норуот айымньытын дьиэтин директора Николай Жирков «С чего начинается Родина?» ырыанан саҕалаата.
Кыттыыны ыллылар: «Энсиэли хотуттара», И.С. Гаврильев аатынан Нам 1№ орто оскуолатын 6А кылааһын ырыа ансаамбыллара, И.Е. Винокуров аатынан Намнааҕы педагогическай колледж преподавателлэрэ, Анна Кутукова, Туйаара Матвеева, Сайнаара Жмурова, биирдиилээн толорооччулар Елена Заровняева, Ирина Неустроева, Афанасий Татаринов, Анна Нестерева, Анна Слепцова, Маайа Григорьева, Туяра Петрова, Екатерина Слепцова, Куннэй Федорова, Ирина Винокурова, Дайаана Сивцева, Матрена Сутакова, Руслан Павлов, Николай Уваров, Артем Дьяконов, Владимир Власов, Сандр Находкин, Уххан Егоров.
Саха саргылаах сайынын көрсө, ылбаҕай ырыа аргыстаах дьоро киэһэ көрөөччүлэргэ кэрэ бэлэх буолла. Ыччат аймах ырыаны сэргииллэрэ, кэлэн истэн-көрөн, ытыс дохсун тыаһын бэлэхтээн, үөлээннээхтэрин кытта сэргэх сынньалаҥҥа кэлэллэрэ олус үөрдэр.
