Дойдуга педагог уонна уһуйааччы сылын чэрчитинэн, ыам ыйын 18 күнүгэр, А.Ф. Шестаков аатынан Улуустааҕы Норуот айымньытын дьиэтин сценатыгар, физика учуутала, кыталыгы чинчийээччи, суруйааччы, айанньыт, фотограф, эколог Иван Ионович Дьячковскай-Кыталык Уйбаан «Кустугу ситтэрбиэн» кинигэтигэр олоҕуран, «Ыраах сирдэргэ тиийдэрбин…» испэктээкил премьерата буолла. Үөрэх салаатыгар киирбит саҥа сүүрээн быһыытынан театральнай куруһуокка дьарыктанан, оҕолор олус кыһамньылаахтык бэлэмнэнэн, хас биирдии оруолларын толору арыйдылар, көрөөччүнү уйадыттылар, сорох түгэҥҥэ күллэрдилэр даҕаны.
Бу испэктээкилгэ босхоҥ оҕо ытык көтөргө — кыталыкка сүгүрүйүү көмөтүнэн, таптал кынатыгар уйдаран, олоххо тардыһыы, дьулуур күүһүнэн атаҕар туран, киһи быһыытынан үүнүүтүн-сайдыытын туһунан көстөр.
Испэктээкилгэ оонньоотулар И. С. Гаврильев аат. Нам 1 N-дээх орто оскуолатын «Образ» театральнай студиятын эдэр артыыстара: Сиэстэрэлэр: Нарыйаана Парникова 8 Г кыл., Маша Федорова 8 Б кыл. Кеша доҕотторо: Айыллаан Дьяконов 7 В кыл., Петя Слепцов 5 Б кыл., Айсен Афанасьев 8 Г кыл. Кеша доҕоро Куоста: Эрик Заровняев 7 В кыл. Ваня убайдара: Мирон Корнилов 7 В кыл., Артур Осипов 7 В кыл. Сиэстэрэ Света: Сардана Сутакова 8 Г кыл. Сүрүн оруолу — Ваня оруолун оонньоото 6 Г кылаас үөрэнээччитэ Святослав Барабанов. Народнай театр артыыстара: Ийэ оруолугар Кристина Ядреева, Аҕа оруолугар — Афанасий Татаринов оонньоотулар.
Испэктээкили туруорда — Намнааҕы народнай театр режиссера Роман Герасимов, сценография — театр художник-оформителэ Руслан Павлов, уотунан киэргэттэ — Симонд Сивцев, музыканан киэргэттэ Андрей Дьяконов.
«Эһиги олоххут уонна чугас, аймах-билэ дьоҥҥут дьылҕалара кыталык халыҥ үөрэ Сахабыт сирин күннээх халлаанын устун дьолу тосхойор айаныгар майгынныахтын! Сахабыт сирин хас биирдии оҕото «мин дьиэм — улахан таптал, улахан олох, улахан дьол уйата!» диэн киэн тутта этиэхтин! Эһигини сэттэ өҥнөөх кустук ыраахха, сырдыкка, ырааска, үтүөҕэ, кэрэҕэ, үйэлээххэ угуйа туруохтун!» — диэн Кыталык Уйбаан этиитин курдук, олоҕу таптыырга, сырдыкка дьулуһарга үөрэтэр-иитэр үтүө үгэстээх театральнай туруоруулар өссө даҕаны көрөөччү үрдүк биһирэбилин ыла турдуннар.
Испэктээкил бүтүүтэ, «Нам улууһа» МТ баһылыгын солбуйааччыта Мария Игнатьева, Нам 1№ орто оскуолатын директора Николай Парников, Саха Өрөспүүбүлүкэтин култууратын туйгуна, режиссер Иван Новиков, Народнай театр артыыската Кристина Ядреева саҥа сүрэхтэммит артыыстары, саҥа туруоруллубут испэктээкилинэн эриэккэс тылларынан эҕэрдэлээтилэр, бэлэх туттардылар.
Кэрэ түгэни мүччү туппакка, театр дьоро киэһэтин кэрэхсэтэр, үтүөнү түстүүр испэктээкил премьератыгар кэлбит бары көрөөччүлэрбитигэр барҕа махталбытын тиэрдэбит! Инникитин даҕаны испэктээкилгэ толору кутуллан кэлэн көрүөххүт, ытыс дохсун тыаһынан артыыстарбытын кынаттыаххыт диэн эрэнэ күүтэбит.
