Ыам ыйын 9 күнэ — Дойдубут үрдүнэн Улуу Күн!
Улуу Кыайыы 78 сылын Нам киинэ киэҥ далааһыннаахтык бэлиэтээтэ.
Сарсыардаттан саллааттыы формалаах, түөстэригэр георгиевскай ленталаах Нам олохтоохторо Ржев куорат туһугар кыргыспыт буойуттары кэриэстиир сквергэ, локальнай сэрии буойуттарыгар, биллиилээх госудаарыстыбаннай уонна политическай деятель, ыар сыллар кэмнэригэр саха норуотун туһугар сүҥкэн үлэни ыыппыт биир дойдулаахпыт И.Е. Винокуров пааматынньыгар уонна Кыайыы скверигэр тыыннаах сибэкки дьөрбөлөрүн ууруу түгэннэрэ ыытылыннылар.
Кыайыы сырдык дьаралыгынан куустарбыт дириҥ суолталаах күҥҥэулууспут бас-көс дьоно, ыччаттар, ытык ветераннара, оонньооботох оҕо саас кэмин ааспыт сэрии оҕолоро кыттыылаах парад колонналара А.А. Игнатьев аатынан стадиоҥҥа кэккэлии хаамсан тиийдилэр. Хас биирдии нэһилиэк былааҕын кытта «Кыайыы болотунатын», сэрии ветераннарын мэтириэттэрин тутан киирдилэр.
Кыттыыны ыллылар: «Нам улууһа» МТ баһылыга Юрий Слепцов, «Нам улууһа» МТ депутааттарын Сэбиэтин председателя Алексей Винокуров, Нам улууһун байыаннай комиссариатын салайар эбээһинэһин толорооччу Лена Дьяконова, Нам улууһун ветераннарын Сэбиэтин председателын солбуйааччы Николай Захаров, ыччат аатыттан Константин Колодезников, нэһилиэктэр баһылыктара уонна олохтоохторо, Нам улууһун ИДьУО үлэһиттэрэ уонна ветераннара, локальнай сэриилэр кыттыылаахтара, 23№-дээх баһаарнай чаас, доруобуйа харыстабылын үлэһиттэрин колонналара, Нам 2№-дээх орто оскуолатын 11-с кылааһа, «Юнармия» оскуола оҕолорун этэрээтэ.
Кыайыы өрөгөй тылларынан, сүрэх төлөн хоһооннорунан дьүһүйэн, күөх хонууга «78» уонна «Кыайыы сулуһа» бэлиэни театрализованнай туруоруу кыттыылаахтара аалай лиэнтэнэн ойуулаан көрдөрдүлэр, «День Победы» күүстээх ырыанан солист Иннокентий Иванов уонна «Добун» эр дьон ансаамбыла толордулар.
Түмүккэ, Нам улууһун «Оһуохай» түмсүүтэ улахан түһүлгэни төрүттээтэ, Улуу Кыайыыны уруйдуу Владимир Осипов оһуохайы таһаарда.
Ол кэннэ, А.Ф. Шестаков аатына Улуустааҕы норуот айымньытын дьиэтигэр «Кыайыы сырдык дьаралыга биһигини кууспута»диэн бырааһынньыктааҕы кэнсиэр буолла. Толору сааланы кутуллубут көрөөччү иннитигэр Намнааҕы народнай теарт, «Ньургуһун» үҥкүү-хор народнай коллектива, «Ретро Данс» народнай ансаамбыл, «Ай-Ледис», «Амаана», «Үргэл» үҥкүү коллективтара, «Дьүөгэлэр» уонна «Коробейники» ырыа народнай ансаамбыллара, «Нарыйаана», «Эҥсиэли хотуттара», «Ил Куо», «Алгыс», «Ай-Ыллаа», «Добун», «Махсыым уолаттара» ырыа ансаамбыллара, И.С. Гаврильев аат. Нам 1№дээх орто оскуолатын үҥкүү уонна ырыа бөлөхтөрө, биирдиилээн толорооччулар Анна Нестерева, Анна Слепцова, Туяра Петрова, Елена Заровняева, дуэт кэргэннии Римма уонна Иннокентий Татариновтар умнуллубат дьоро киэһэни бэлэхтээтилэр.
Саҥа олох кэлэригэр эрэл кыымынан
Олоҕу ситэ олорботох дьоммут
Олоххо дьулуурдарын
Хаалбыт дьон биһиги
Салҕыыр аналлаахпыт,
Ааспыты ахтан-санаан,
Өйдүү-саныы сылдьыахпыт!
