Биир идэлээхпит кэриэһигэр

Саха киһитэ айылҕатынан олорор. Күн сиригэр Киһи кэлэригэр суола Үөһэттэн ыйыллар. Ардыгар биир киһиэхэ бары дьоҕуру барытын аныыр, ардыгар — биири чопчулаан ыытар.

Муус устар 17 күнүгэр көрөөччү кутун-сүрүн туппут биир идэлээхпит, талааннаах ыччат, ырыа айааччы, элбэх ырыа күрэхтэрин кыайыылааҕа, оһуохайдьыт, олоҥхоһут, тойуксут Ким Осипов сырдык кэриэһигэр аналлаах ахтыы тэрээһиннэр ыытылыннылар.

Ким Алексеевич 1993 сыллаахха от ыйын 9 күнүгэр Бүлүү куоратыгар күн сирин көрбүтэ. Оҕо эрдэҕиттэн тулалыыр айылҕатын сэргии улааппыта диэн чугас дьоно ахталлар. Бүлүү улууһун Тааһаҕар нэһилиэгин оскуолатын ситиһиилээхтик бүтэрбитэ.

Иккис дойду оҥостубут Нам улууһун Көбөкөн нэһилиэгэр П.П.Ядрихинскай-Бэдьээлэ аатынан Сынньалаҥ киинигэр айымньылаахтык үлэлээбитэ. 2024 сылтан анал байыаннай дьайыы байыастарын кэккэлэригэр киирбитэ. Өссө даҕаны айыах-тутуох, олоҕу уһансыах киһибит эдэркээн олоҕо 2025 сылга быстыбыта.

П.И.Сивцев аатынан Намнааҕы история уонна этнография музейын аактабай саалатыгар Ким Осипов ийэтэ Валентина Иннокентьевна, тапталлаах кэргэнэ Анастасия Сергеевна, Бүлүү улууһун «Тааһаҕар нэһилиэгэ» ТСТ баһылыга Семен Каратаев, кылааһын салайааччыта Саргылана Прокопьева, эдьиийэ Альбина Григорьева, Бүлүү куортаны социальнай эгэтин үлэһитэ, АБДь волонтера Мария Иванова, Ким бииргэ улааппыт чугас доҕотторо уонна Нам улууһун култууратын үлэһиттэрэ, ыкса алтыспыт доҕотторо буолан түмсэн Ким Осипов оҕо сааһыттан, үөрэнэр, үлэлиир кэмнэриттэн ахтыы долгутуулаах тэрээһинэ ыытылынна. Ким кыра эрдэҕиттэн туохха барытыгар болҕомтолооҕо, малы-салы барытын саамылаан кичэллик туттара, олус ыраас буочардааҕа, кыратыттан ырыаны таптыыра, элэккэй майгыта, өрүүтүн саҥаны, үтүөнү оҥорорго дьулуура, оскуолаҕа үөрэнэ сылдьан Тааһаҕарга бастакы айар киэһэтин тэрийэн ыыппыта олус истиҥник ахтылынна. Ону сэргэ, Ким олоҕун кэрдиистэриттэн хаартыскалар, икки фотоальбом тахсыбыта, экраҥҥа видеонан Ким кыра сааһыттан саҕалаан тиһэх күнүгэр дылы араас кэмнэр устуулара көрдөрүлүннэ.

Иккис чааһа — А.Ф. Шестаков аатынан Улуустааҕы норуот айымньытын Дьиэтигэр «Харыстааҥ олоҕу» Ким Осипов сырдык кэриэһигэр кэнсиэр. Манна кини суруйбут ырыалара ылланнылар. Бииргэ алтыспыт доҕотторо, Бүлүү улууһун Тааһаҕар нэһилиэгин «Эйгэ» норуот айымньытын Дьиэтин айар бөлөхтөрө, Ким Алексеевич тэрийбит «Дуоҕа» эр дьон вокальнай ансаамбыла, П.П.Ядрихинскай-Бэдьээлэ аатынан Көбөкөн Сынньалаҥ Киинин коллектива кыттыыны ыллылар. Ким Алексеевич ийэтэ, кэргэнэ, оҕолоро, Бүлүү улууһун «Тааһаҕар нэһилиэгэ» ТСТ баһылыга Семен Самуилович Каратаев Нам дьонугар-сэргэтигэр махталларын тиэртилэр.