Нам улууһугар кэрэ аҥардар түмсүүлэрэ общественнай үлэҕэ көхтөөхтөр. Олортон биирдэстэрэ бүгүн муус устар 4 күнүгэр Нам улууһун иэйэр куттаах бөлөхтөрүттэн биирдэстэрэ “Кыталыына” үҥкүү коллектива тэриллибитэ 10 сыллаах айар киэһэтэ буолан ааста. Бу сыллар устата бөлөх кыттааччылара — улуус киэн туттар үлэһит кэрэ кыргыттара, ыал ийэлэрэ дьиэ түбүгүттэн, үлэ сүпсүлгэниттэн быыс-арыт аттарынан үҥкүү үрдүкү искусстватыгар күннэтэ дьарыкка сылдьан уһуйуллаллар, туруктарын, иэйиилэрин туругурдаллар уонна нэһилиэккэ, улууска, өрөспүүбүлүкэҕэ ыытыллар араас таһымнаах күрэстэргэ ситиһиилээхтик кыттан Намы ааттаталлар, тэрээһиннэри ураты үҥкүүлэринэн киэргэтэллэр.
Үөрүүлээх бэлиэ айар киэһэҕэ Нам улууһун култуура уонна духуобунас сайдыытын салалтатын начальнига Семен Ядрихинскай, А.Ф.Шестаков аатынан Улуустааҕы норуот айымньытын Дьиэтин уус-уран салайааччыта Елена Степанова, «Кыталыына» үҥкүү коллективын кыттааччыларын тэрилтэлэрин салайааччылара, профсоюзтара, үлэһиттэрэ эҕэрдэ эриэккэһин эттилэр, бэлэх туттардылар, махтаннылар.
Татьяна Федорова-Мичийэ Куо, Анастасия Олесова, Сардаана Харитонова, Данил Эверстов, Нам нэһилиэгин «Ситим» үҥкүү коллектива (сал. Саргы Кэрэмэс), Хатыҥ-Арыы нэһилиэгин «Сыдьаайа» үҥкүү коллектива (сал. Анжелика Ноговицына), «Эҥсиэли» (сал. Сардаана Харитонова), «Ай-ыллаа» (сал. Ирина Винокурова), ырыа ансаамбыллара ылбаҕай ырыаларынан, эриэккэс үҥкүүлэринэн ситэрдилэр. Ону сэргэ, тарбахтарыгар уус-оһуор талааннаах «Кыталыына» үҥкүү коллективын кыттааччылара Анастасия Олесова, Мария Большакова, Валентина Суздалова бэйэлэрин уран оҥоһуктарын көрөөччүлэригэр соһуччу бэлэх оҥордулар.
«Кыталыына» сүрүн ситиһиитэ — үтүөҕэ, үйэлээххэ көҕүлээһин тирэҕэ уонна араас идэлээх, дьылҕалаах дьахталлары биир айар дьиэ кэргэҥҥэ ситимниир бөҕө утах буолла. Коллектив 16 үҥкүүһүттээх, олор ортолоругар үөрэх, доруобуйа харыстабылын, култуура эйгэтин үлэһиттэрэ бааллар.
Эҕэрдэ эриэккэһэ, алгыс мааныта ананнын — айар куттаах “Кыталыына “ үҥкүү коллективыгар! Киэн тутта махтанан туран хас биирдиигитигэн чэгиэн туругу, айар эйгэҕитигэр саҥа арыйыылары, саҥа сүүрээннэри, саҥа ситиһиилэри баҕарабыт!
Об авторе
