Кулун тутар 19 күнүгэр Дьокуускай куорат Ю.А.Гагарин аатынан култуура уонна аныгы искусство киинигэр Саха сиригэр култуура сылын чэрчитинэн, Россия култууратын үлэһиттэрин күннэринэн Саха сирин бары улуустарыттан, куораттарыттан норуот нэһилиэстибэтин харыстыыр, харайар, үөрэтэр, тарҕатар аналлаах дьону-сэргэни сырдык олоххо угуйар култуура кииннэрин, култуура уонна духуобунас сайдыытыгар салалталарын салайааччылара, үлэһиттэрэ муһуннулар. Тэрээһин култуура эйгэтигэр ааспыт сыл көрдөрүүтэ, таһаарыылаах үлэ уопута ырытылынна. Тэрээһин сыл бастыҥнарын бэлиэтээһининэн түмүктэннэ.
А.Ф. Шестаков аатынан Улуустааҕы норуот айымньытын Дьиэтин фольклорга специалиһа, «Нам кылыһах», «»Кылы һаҕабын», «Сарыада», «Намылы» төрүт дорҕоон бөлөхтөрүн, «Талбаана» чабырҕах бөлөҕүн салайааччыта Мария Степановна Григорьева-Маайа «Саха Өрөспүүбүлүкэтин култууратын эйгэтин бастыҥ үлэһитэ» үрдүк бэлиэни тутта.
Өрөспүүбүлүкэҕэ ааспыт түмүгүнэн үрдүк көрдөрүүлээх, таһаарыылаах үлэлээх бастыҥ култуура тэрилтэлэрин ортолоругар Анна Григорьевна Мылаханова салайааччылаах Нам улууһун «Хомустаах Бастакы нэһилиэгэ» ТСТ «Алгыс» норуот айымньытын киинэ ааттанна.
Бииргэ үлэлиир коллегаларбытыгар Мария Степановна Григорьева-Маайаҕа, Анна Григорьевна Мылахановаҕа уонна «Алгыс» норуот айымньытын киин коллективыгар айар, тэрийэр, түмэр, көҕүлүүр үлэ сыаналанан, сыл бастыҥнара буолбуттарынан ис сүрэхтэн киэн тутта эҕэрдэлиибит! Баҕарабыт ыстаал доруобуйаны! Инникитин даҕаны айар үлэ алгыстаах аартыктара арылла, саҥа саҕахтарга, саҥа ситиһиилэргэ тиэрдэ турдуннар!
Об авторе
