Бэс ыйын 10 күнүгэр, Н.М. Рыкунов аатынан Нам улуустааҕы киин библиотека конференц-саалатыгар ССРС культуратын туйгуна, СӨ культуратын үтүөлээх үлэһитэ, Россия “Бастыҥ культура үлэһитэ” бэлиэлээх, “Материнство” мэтээл II  ст. уордьан кавалера, Ил Дархан “Үлэ киһитэ” бириэмийэтин лауреата, “СӨ норуотун уус-уран айымньытын сайдыытыгар кылаатын иһин”, “Гражданскай килбиэн”  бэлиэлэр хаһаайына, Нам улууһун, Таастаах, Ленскэй нэһилиэктэр Ытык киһилэрэ, самодеятельнай композитор, культура эйгэтигэр 51 сыл хормейстерынан эҥкилэ суох үлэлии сылдьар Елена Александровна Кутукова олоҕун, айар үлэтин сырдатар «ДЬОЛУМ — ҮЛЭБЭР» диэн дьоһун кинигэтин сүрэхтэниитэ буолла.  «Сөбүлүүр идэбэр таба тайаныым – дьылҕам бэлэҕэ» кинигэ быыстапката Елена Александровна үлэтин кэрэһэлии туруоруллубут. Үөрүүлээх тэрээһини бибилиотекарь Раиса Дьяконова иилээн-салайан ыытта.

Елена Александровна кинигэтигэр олоҕун туһунан суруйуулара, улуустааҕы “Эҥсиэли” хаһыакка тахсыбыт ыстатыйалара, үөлээннээхтэрин, бииргэ үлэлээбит уонна үлэлии да сылдьар биир идэлээхтэрин ахтыылара, ону сэргэ айбыт ырыаларын ноталара бииргэ түмүллэн киирбиттэр. Ыҥырыылаах ыалдьыттар эҕэрдэ тыл эриэккэһин эттилэр, «Дьүөгэлэр» народнай уонна «Нарыйаана» ырыа ансаамбыллара, Николай Жирков ылбаҕай ырыаларын анаатылар.

Елена Александровна айылҕа маанылаабыт айар куттаах буолан, үгүс сыллар тухары ырыа ымыылаах үлэтинэн Дойдуга култуура сайдыытыгар сүҥкэн үлэни көрдөрдө, саҥа көлүөнэҕэ тулхадыйбат тулааһыннаах тирэҕи олохтоото. Норуот уус-уран айымньытын көҕүлүүр, дьоҥҥо-сэргэҕэ олох кэрэтин тапталынан туойар дьылҕа бэлэҕэ кэриэтэ идэтинэн биһиэхэ холобур буолар.

Биһиги коллектив киэн туттар Ытык Кииһибит, биир идэлээхпит Елена Александровнаны өссө төгүл эҕэрдэбитин тиэрдэбит уонна баҕарабыт өссө даҕаны саҥа айымньылар айыллан истиннэр, чэмэлкэй күн курдук сандаархай кэрэ доруобуйаны, күөрэгэй чыычаах көччүйэр үөрүүтүн, чэлгиэн хонуу курдук сиэдэрэй олоҕу баҕарабыт.