Сэтинньи 10 күнүгэр, айар-туойар айылгылаах Нам улууһун ырыа айааччыларын «Туллук хаара» түмсүүтэ тэриллибитэ 45 сылын бэлиэтиир дьоро күнэ киэҥ далааһыннаахтык буолан ааста.
П. И. Сивцев аатынан Намнааҕы история уонна этнография музейыгар быыстапка турда, улуустааҕы Кииннэммит библиотекаҕа мелодистар төгүрүк остуоллара ыытылынна.
Киэһитин, ыллам ырыа сүгүрүйээччилэрин «Ырыа куттаах Туллук хаара» улахан түһүлгэҕэ түмтэ.
Үөрүүлээх тэрээһини Нам улууһун мелодистарын түмсүүтэ «Туллук хаара» өрөгөй ырыанан арыйда.
Уостан түспэт, сүрэхтэн сүппэт, киһи-аймаҕы кынаттыыр ыралаах ырыалар бу дьоро киэһэҕэ ылланнылар.
Кыттыыны ыллылар ылбаҕаай ырыаһыттар уонна Нам улуууһун мелодистара Саха Өрөспүүбүлүкэтин култууратын туйгуна, үгүс ырыа автора, “Туллук хаара” мелодистар түмсүүтүн салайааччыта Андрей Замятин, Мария Хаетова, Надежда Макарова, Татьяна Гаврильева, Ирина Неустроева, Любовь Иванова, Дьол Сандаара, Дана Парникова, Мария Соловьева, Лена Корякина, Анюта Григорьева, Ирина Винокурова, кэргэннии Надежда уонна Михаил Макаровтар, Анна уонна Петр Охлопковтар, Афанасий Татаринов, Андрей Старков, Николай Протопопов, Ньургустан Жирков, Афанасий Иванов, Петр Попов, Николай Уваров, Сандр Находкин-Сандаар, Владислав Попов, Владислав Константинов. Ону сэргэ, «Дьүөгэлэр» народнай ансаамбыл , «Ырыа аргыстаах» квартет, «Намылы» трио, «Ай-ыллаа», «Алгыстаана», «Ил Куо», «Махсыым уолаттара» ырыа ансаамбыллара, «Ньургуһун», «Ручеек», «Дабаан», «Амаана», «Ай-ледис», «Үргэл» үҥкүү народнай коллективтара, «Сардаана» мода театра дьоро киэһэни киэргэттилэр. Баяҥҥа доҕуһуоллаата – СӨ култууратын туйгуна, мелодист Афанасий Татаринов.
Юбилейдаах киэһэ ыҥырыылаах ыалдьыттара «Нам улууһа» МТ баһылыга Юрий Иннокентьевич Слепцов, «Нам улууһа» МТ депутаттарын Сэбиэтин председателя Алексей Иванович Винокуров, СӨ култуураҕа уонна духуобунай сайдыыга Министиэристибэтин Олохтоох бэйэни салайыныы уорганнарын кытта үлэлэһэр отдел салайааччыта Вера Афанасьевна Моисеева, СӨ ырыа айааччыларын Сойууһун чилиэнэ, СӨ култуураҕа уонна духуобунай сайдыыга Министиэристибэтин Геокультурнай сайдыы институтун методиһа, СӨ култууратын Үтүөлээх үлэһитэ Саргылана Саввична Адамова эҕэрдэ эриэккэс тылларын эттилэр, бэлиэ, бэлэх туттардылар.
Ырыа ымыылаах, үҥкүү иэйиилээх эҕэрдэлээх кэнсиэри Мария Петрова, Николай Жирков иилээн-саҕалаан ыыттылар.
«Туллук хаара» Нам улууһун мелодистарын түмсүүтэ тэриллибитэ 45 сыллаах үбүлүөйүгэр көрөөччү-истээччи олус астына сырытта, дуоһуйан, дууһалыын сынньанан тарҕаста.
Об авторе
