Ахсынньы 20 күнүгэр А.Ф. Шестаков аатынан Улуустааҕы норуот айымньытын дьиэтигэр 9-с төгүлүн ыытыллар «ФЕЙЕРВЕРК ТАЛАНТОВ» күрэххэ Нам улууһун айар куттаах оҕолоро муһуннулар.
Үөрүүлээх тэрээһини «Ленскэй нэһилиэк» МТ баһылыгын солбуйааччыта, Нам нэһилиэгин саастарын ситэ илик оҕолор уонна кинилэр бырааптарын көмүскүүр общественнай Сэбиэт председателя Тимофей Егорович Охлопков эҕэрдэ тылынан арыйда.
Хас биирдии оҕо талааннаах. Ол гынан баран, сөптөөх түгэн көстүбэккэ, үгүс талаан арыллыбакка хаалар. Онтон бу проект анаан-минээн оҕо киэҥ эйгэҕэ тахсарыгар тирэх буолар. Маннык проектан киһи кынат анньынан инники олоҕор сырдык суол оҥостор. Ол курдук, сылын ахсын кыттар оҕолор тубустар-тупсан, улаатан, бэйэлэригэр эрэллэрэ күүһүрбүттэрэ бу күрэххэ харахха тута быраҕылынна.
Алыптаах аптаах Саҥа дьылы көрсө, ырыа, үҥкүү, хомус, норуот ырыалара, чабырҕах, уус-уран ааҕыы, уруһуй, илиинэн саҥа дьыллааҕы араас оҥоһуктар күрэхтэрин көрүҥнэригэр 156 оҕо кытынна. Дьүүллүүр сүбэҕэ саастарын туола илик оҕолору кытта үлэҕэ Нам улууһунааҕы комиссия эппиэттээх сэкирэтээрэ Я.П. Сыромятникова, Нам улууһун Үлэ уонна нэһилиэнньэ социальнай харысхалын управлениятын реабилитолог-специалиһа А.М. Баишева, «Нам улууһа» МТ дьаһалтатын Опекаҕа уонна попечительствоҕа үлэ отделын сүрүннүүр специалиһа Л.И. Ильина, Афанасий Шестаков аатынан Улуустааҕы норуот айымньытын дьиэтин «Ньургуһун» народнай хор концертмейстера, «Добун» эр дьон вокальнай ансаамбылын салайааччыта А.И. Татаринов, А.Ф. Шестаков аатынан Улуустааҕы норуот айымньытын дьиэтин хореограва В.В. Николаев, Прокопий Ядрихинскай-Бэдьээлэ аатынан Олонхо дьиэтин специалиһа С.А. Находкин үлэлээтилэр. Уруһуй, илиинэн оҥоһуктары Нам улууһун «КубИт» ТехноПарк киинин директора Е.А. Андросова уонна Захар Винокуров аатынан Намнааҕы оҕо искусстватын оскуолатын преподавателлэрэ К.И.Колодезникова, С.Н. Шамаева сыаналаатылар.
Түмүккэ «Фейерверк талантов» улуустааҕы конкурс кыайыылааҕынан Дьулурҕан Харитонов таҕыста. Салайааччыта Захар Винокуров аатынан Намнааҕы оҕо искусстватын оскуолатын преподавателя Мария Егоровна Дьяконова. Дьулурҕан 2022 сыллааҕы күрэххэ аан бастакытын кыайыылаах буолбута. Сыл устата толоруу маастарыстыбатыгар дьарыгын күүһүрдэн, быйыл иккис төгүлүн кыттан, эрэллээхтик бастаата.
«Проект кыттааччыта сылын ахсын үксээн иһэр. Оҕо аймах талаана манан эрэ бүппэт. Кинилэр кырачаан баҕа санааларын толорорго биһиги улахан дьон кыһамньыбытын, болҕомтобутун ууруохтаахпыт уонна кистэнэ сылдьар талааннарын таба тутан дьарыктаан, сайыннаран, киэҥ аартыктарга, үрдүк ситиһиилэргэ таһаарарга саамай сүрүн тирэхтэрэ буолабыт. Оҕолор бүгүн наһаа маладьыастаатылар диэн хайҕыыбын. Бэйэлэригэр эрэллэрэ биллэ тупсубут» — диэн көҕүлээччи, тэрийээччи «Ленскэй нэһилиэк» МТ дьаһалтатын саастарын ситэ илик оҕолор уонна кинилэр бырааптарын көмүскүүр үлэҕэ специалист Анна Ильинична Слепцова үөрүүтүн үллэстэр.
