Былыргы дьыллар быраман мындааларыттан, урукку дьыллар улаҕалаах уорҕаларыттан түстэнэн тиийэн кэлбит сүдү күүстээх, мындыр майгылаах САХА ОМУК тыйыс тымныы дойдуга ОЛОХ туһугар охсуһуута, үтүө-мөкү, сырдык-хараҥа тыыннары кытта алтыһыыта, ырааҕы көрөн ыраҥалыыра, кэскиллээҕи талан тэнитэрэ барыта биир эпоска — Олоҥхоҕо бэлиэтэнэр.
Быйылгы сыл Нам улууһугар биллиилээх олоҥхоһут, норуот ырыаһыта, Саха АССР култууратын үтүөлээх үлэһитэ, ССРС суруйааччыларын сойууһун чилиэнэ, биир дойдулаахпыт Прокопий Прокопьевич Ядрихинскай-Бэдьээлэ төрөөбүтэ 125 сыла. Бэдьээлэ — норуот киһитэ. Айылҕаттан айдарыылаах, устар ууну сомоҕолуур уран тыл маастара, олоххо, үлэҕэ дьон өйүн-санаатын, кутун-сүрүн түмэн, киэҥ түhүлгэни төрүттээн, Саха олоҥхотун үйэтитэргэ бэйэтин кэнниттэн “Дьырыбына дьырылыатта” кыыс бухатыыр туһунан дириҥ философиялаах айымньытын хаалларбыта.
Кини сырдык аатын сүгэр Олоҥхо Дьиэтигэр кулун тутар 28 күнүгэр “Бэдьээлэ олоҥхото — үйэлэргэ алгыстара” амтаннаах алаадьылаах, итии үүттээх чэйдээх олоҥхо истиитэ буолан ааста. А.Ф.Шестаков аатынан Улуустааҕы норуот айымньытын Дьиэтин Уран тыл маастарыстыбатыгар уһуйааччы, саха фольклорун, үгэстэрин тарҕатааччылартан биир бастыҥнара, өрөспүүбүлүкэҕэ ыытыллар олоҥхо күрэстэрин хас да төгүллээх кыайыылааҕа, СӨ Үтүөлээх оһуохай этээччитэ Вера Куличкина-Цыпандина уонна кини салайан, үөрэтэн илдьэ сылдьар ыччаттара Ньургустаана Лебедева, Эвилья Шадрина, Юра Мордовской буолан хомуур олоҥхону иһитиннэрдилэр.
Сүдү олоҥхону тарҕата сылдьар айар куттаах эйгэлээхтэрбитигэр П.П.Ядрихинскай-Бэдьээлэ аатынан Олоҥхо Дьиэтин коллектива иһирэхтик махтанан туран бэлиэ суруктарын, сибэкки дьөрбөтүн туттардылар. Үйэлээх тыыннаах олоҥхону истии тэрээһинэ үбүлүөйдээх бэлиэ сылы уруйдуур оһуохайынан түмүктэннэ.
Киһиэхэ, сааһыттан тутулуга суох, айар-толкуйдуур, саамылыыр-анаарар дьоҕурун Олоҥхобут түстүүр. Кэскиллээх ыччаттар Олоҥхону истэн, үөрэтэн, дьон-сэргэ иннитигэр толорон төрөөбүт дойдуга, ийэ тылга тапталы күүһүрдэллэр, норуот ытык өйдөбүлүн иҥэринэллэр, төрүт үгэскэ сатабылы дириҥэтэллэр, билиин-көрүүнү сайыннараллар.
Олоҥхону истии, олоҥхо туруорууларын көрүү түһүлгэтэ кэҥии, тэнийэ турдун!
Об авторе
