Прокопий Ядрихинскай-Бэдьээлэ төрөөбүтэ 125 сылын көрсө кулун тутар 28 күнүгэр киэһэ 17-00 чаастан А.Ф.Шестаков аатынан Улуустааҕы норуот айымньытын Дьиэтигэр «Көмүс мааска» национальнай театральнай бириэмийэ түөрт төгүллээх номинана, Санкт-Петербург куоракка ыытыллыбыт Аан дойдутааҕы Театральнай Олимпиада уонна Индия Нью-Дели, Нагпур куораттарыгар ыытыллыбыт «Бхарат Ранг Махотсав» бэстибээл кыттыылааҕа, Олоҥхо тыйаатырын биир ордук табыллыбыт, сиппит-хоппут айымньытынан ааҕыллар Прокопий Ядрихинскай-Бэдьээлэ “Дьырыбына Дьырылыатта” олоҥхотунан испэктээгэ буолаары турар.
Матрена Корнилова туруоруута, пластикаҕа режиссер Мария Маркова, инсценировка – Зоя Попова. Сценограф, олоҥхо туруоруутугар көстүүмнэр худуоһунньуга – Екатерина Шапошникова.
«Дьырыбына Дьырылыатта» олоҥхо — орто дойдуга олоххо кэрэни саҕаары, үтүөнү түстээри кэлбит кэрэчээн нарын кыыс соһуччу буолбут түгэҥҥэ дьонун-сэргэтин, сирин-уотун, айылҕатын хара дьайтан харыстаан, күүстээх санаатынан, дьулуурунан эр хорсун быһыытын көрдөрөр. Биир дойдулаахпыт, биллиилээх норуот ырыаһыта, олоҥхоһут Прокопий Ядрихинскай-Бэдьээлэ хайдахтаах курдук уран тыллаах-уустаах, уратын тыыннаах айымньыны кэлэр көлүөнэҕэ, норуотугар сыаналаммат нэһилиэстибэтин хаалларбытын кэлбит эрэ көрөөччү сөҕө-махтайа сэҥээриэҕэ.
Об авторе
