2026 сыл култуура үлэһиттэригэр сүҥкэн суолталаах. Саха норуотун тылынан уус-уран айымньытын, төрүт дорҕоонун, ураты ырыатын-үҥкүүтүн, дьэрэкээн таҥаһын, мындыр оҥоһугун харыстаан, сөргүтэн, чинчийэн, үөрэтэн, талааннаах дьону түмэн, киэҥ эйгэҕэ сайыннаран таһаарарга туһуланар тэрээһиннээх үлэ — култуура тэрилтэлэрин сүрүн соруктара буолар.
Кулун тутар 19 күнүгэр Платон Ойуунускай аатынан Саха академическай тыйаатырыгар биир дойдулаахпыт, биллиилээх судаарыстыбыннай уонна политическай деятель Илья Егорович Винокуров төрөөбүтэ 130 сылыгар аналлаах Өлөөн, Булуҥ, Усуйаана, Бүлүү, Чурапчы, Нам улуустарын, Дьокуускай куорат айар куттаах дьонун-сэргэтин эҕэрдэлээх кэнсиэрэ буолан ааста.
Тэрээһин Нам 2-с №дээх орто оскуолатын үөрэнээччитэ Коля Кривошапкин сүдү салайааччыга анаммыт дакылаатын видеотынан саҕаланна.
«Нам улууһа» муниципальнай оройуон баһылыга Юрий Иннокентьевич Слепцов эҕэрдэ тылынан арыйда. Илья Егорович оччотооҕу тыйыс кэмнэргэ саха дьоно тыыннаах хаалар дьылҕаларыгар оҥорон хаалларбыт үтүө өҥөтүн бу киэһэ кэлбит, кыттыбыт дьон ытыктыы ахтан-санаан аастылар.
Кыттыыны ыллылар:
Дьокуускайтан биир дойдулаахтарбыт, СӨ народнай артыыстара Анегина Дьяконова, Александр Емельянов, Усуйаанаттан Култуура уонна духуобунас сайдыытын салалтатын начальнига Аполлон Болтунов, Булуҥ улууһуттан СӨ Үтүөлээх артыыһа Эдуард Баланов, Өлөөнтөн Саргылана Карпова-Имаана, Бүлүү улууһун аатыттан СӨ Үтүөлээх артыыһа Павел Семенов, СӨ култууратын туйгуна Эрчим, Чурапчыттан СӨ култууратын туйгуна Марианна Федотова-Намыына, Дьокуускайтан «Сандал» оҕо үҥкүү народнай ансаамбыла (салайааччы СӨ Үөрэҕириитин уонна СӨ култууратын туйгуна Сардана Катакова), «Арктик цирк» оҕо цирковой студията (салайааччы СӨ култууратын туйгуна Марианна Еремеева), Намтан «Ньургуһун» үҥкүү народнай коллектива (салайааччы СӨ култууратын туйгуна Мария Попова), «Мичээр» үҥкүү народнай ансаамбыла (салайааччы СӨ култууратын туйгуна Татьяна Филиппова), «Оһуор» үҥкүү коллектива (салайааччы Варвара Иванова), «Чаҕылыс» литературнай бөлөх (салайааччы РФ Үөрэҕириитин бочуоттаах үлэһитэ, СӨ Үөрэҕириитин туйгуна Анна Васильева), «Дуорай» эр дьон ансаамбыла (салайааччы СӨ култууратын туйгуна Саргылана Пономарева), З.П.Винокуров аатынан Намнааҕы оҕо искусстватын үөрэнээччитэ Талбан Парников, И.Е.Винокуров аатынан НПК «Сардаана» мода тыйаатыра (салайааччы Надежда Стручкова).
Ырыа-үҥкүү кэһиилээх сомоҕолоһуулаах кэнсиэри Мария Парникова, Дмитрий Местников иилээн-салайан ыыттылар.
Норуоттан үүнэн тахсыбыт, ыарахан сылларга норуот туһугар олоҕун анаабыт, норуотун чиэһин, суобаһын туруулаһан көмүскээбит, биир дойдулаахпыт, уһулуччулаах судаарыстыбаннай уонна политическай деятель Илья Егорович Винокуров аата мэлдьи ахтылла, ааттана туруоҕа.
Об авторе
