Олунньу 22 күнүгэр Нам улууһун ырыа куттаах эр дьоно Аҕа дойдуну көмүскээччилэрин күнүнэн үтүө үгэскэ кубулуйбут “Эҥсиэли уолаттара ыллыыллар” эҕэрдэлээх айар киэһэлэрэ буолан ааста.
Биир дойдулаахпыт, “САХА” национальнай көрдөрөр-иһитиннэрэр хампаанньа ыытааччыта Георгий Белоусов иилээн-салайан ыытта.
Бу бырайыакка хас да төгүл кыттыбыт, Үөһээ Бүлүүттэн төрүттээх Нам улууһун Көбөкөн нэһилиэгэр үлэлээн, олохсуйан, ыал буолан, уол оҕолорунан уруйданан, ураты күүстээх, киэҥ диапазоннаах куоластаах эдэр ааптар Ким Осипов «Харыстаа олоҕу» ырыатынан быйылгы кэнсиэр саҕаланна.
Ким Осипов — култуура эйгэтигэр чаҕылхай сулус. Хатыламмат ураты талаанынан дьон-сэргэ кутун-сүрүн туппута. Хомойуох иһин, Дойдутун туһугар итии толооҥҥо эдэркээн тыынын толук ууран, биһиги кэккэбитигэр бүгүн суох. Экраҥҥа кини сырдык мөссүөнэ көстөн, кини дьиэрэйэр ырыатын куолаһа хас биирдиибит сүрэҕин уйадытта.
Нам улууһугар төрөөбүт, улааппыт, үөрэммит, араас эйгэҕэ үлэлии сылдьар ыччаттарбыт, ыал аҕалара кыттыбыттара быйыл 10 сыла буолла. Бырайыак көҕүлээччитэ — ССРС култууратын туйгуна, “Российскай Федерация култуура эйгэтин бастыҥ үлэһитэ” бириэмийэ лауреата, СӨ култууратын Үтүөлээх үлэһитэ, үтүөлээх хормейстер Елена Александровна Кутукова.
Уон сыл устата, үөрэхтэн, үлэттэн, күннээҕи түбүктэн уолаттарбыт быыс-арыт буланнар, бэйэлэрин ырыаларын, олохтоох ааптардар уонна өрөспүүбүлүкэ ырыа айааччыларын айымньыларыттан толорон кэллилэр. Дойдуга, дьоҥҥо тапталы, бэриниилээх буолууну, олоххо эрэли күүһүрдэр, көхтөөх буолууга ыҥырар ырыаларынан улууспут уонна Сахабыт сирин култуурнай-сырдатар эйгэтигэр хас биирдиилэрэ сэмэй кылааттарын киллэрсэллэрэ олус кэрэхсэбиллээх уонна махталлаах.
Кыттыыны ыллылар: Көбөкөнтөн Илларион Пестерев, Михаил Слепцов, Ян Чоросов, Хатырыктан “Махсыым уолаттара” эр дьон ырыа ансаамбыла — салайааччы Иннокентий Татаринов, М.К.Аммосов аатынан Хатырык орто оскуолатын 9-с кылааһын үөрэнээччитэ Артем Кириллов, М.Н.Жирков аатынан Дьокуускайдааҕы музыкальнай училище II-с кууруһун устудуона Дьулурҕан Харитонов
Хатыҥ-Арыыттан Владимир Власов, Намтан Николай Уваров, Артем Тюкянов, Петр Максимов, Виссарион Бочкарев, Владимир Куличкин-Цыпандин, Ньургун Федоров, И.С.Гаврильев аатынан Намнааҕы 1№ орто оскуола 9-c кылааһын үөрэнээччитэ Святослав Барабанов уонна 8-c кылааһын үөрэнээччитэ Айхал Татаринов
Добун” эр дьон ырыа ансаамбыла — салайааччы Афанасий Татаринов, Бастакы Хомустаах нэһилиэгиттэн Радомир Лиханов, Иван Милютин уонна Александр Рязанскай салайар ”Дорҕоон” эр дьон вокальнай-инструментальнай ансаамбыла.
Ырыа бэлэхтээх киэһэ Саха Өрөспүүбүлүкэтин култууратын туйгуна, мелодист Афанасий Татаринов “Биир сомоҕо” ырыатын бары кыттааччы эр дьон толоруутунан түмүктэннэ.
Быйылгы үбүлүөйдээх дьоро киэһэҕэ саҥа кыттааччылары тэрийээччилэр даҕаны, көрөөччүлэр даҕаны олус биһирээтибит, астына иһиттибит. Инникитин даҕаны бу бырайыак саҥа талааннары сайыннаран көрөөччү киэҥ сэҥээриитигэр сирдии турдун!
Об авторе
