Олунньу 20 күнүгэр Арассыыйаҕа норуотта сомомолоһууларын, Саха сиригэр култуура, Нам улууһугар биллиилээх судаарыстыбаннай деятель Илья Егорович Винокуров төрөөбүтэ 130 сылын чэрчитинэн, Нам киинигэр М.К. Аммосов аатынан култуура уонна духуобунас сайдыытын дыбарыаһыгар “Сүрэхпит — дойдубут туһугар! Доруойдарга Албан аат” киэҥ далааһыннаах күн ыытылынна.
Бэлиэ күҥҥэ Кыайыы уонна байыаннай дьайыы кыттыылаахтарыгар анаммыт сквердэргэ сүгүрүйүү, киин болуоссакка куту-сүрү бөҕөргөтөр алгыс сиэрэ-туома ыытылынна (алгысчыт Владимир Сыромятников), туругу чиҥэтэр эрчимнээх эр дьон оһуохайадаатылар (оһуохайы таһаарда Руслан Павлов).
Дыбарыаска Үөрэх салалтатын көҕүлээһининэн оскуола оҕолоро салааттарга анаан сурук суруйдулар, ону сэргэ үөрэнээччилэр дойдуга бэриниилээх буолууга туһуланар выставкалара турда. З.П. Винокуров аатынан Намнааҕы оҕо искусстватын оскуолатын педагогтара кэлбит дьонунан саллааттарга анаан күүстээх санааны чиҥэтэр алгыстаах аккырыыккалары оҥоттордулар, итии хааһылаах, чэйдээх “Салаат куукуната” үлэлээтэ, Намнааҕы “Бастакылар хамсааһыннара” оҕо общественнай түмсүүтэ “Казарма весёлых затей” оонньуулары ыытта.
Кэрэ аҥардар саллааттарга анаан хаххаланар сиэккэни баайдылар, “Илии сылааһа” диэн нэһилиэктэртэн волонтердар байыаннай экипировкаларга маастар-кылаас ыыттылар.
Намнааҕы кииннэммит библиотечнай ситим байыастар тустарынан тахсыбыт кинигэлэрин, сурунаалларын, хаһыакка таһаарыыларын выставката, П.И.Сивцев аатынан Намнааҕы история уонна этнография түмэлэ байыаннай тыыннаах фотозоната дьон сэҥээриитин ылла.
Сүгүрүйэр, махтанар, санааны бөҕөргөтөр тэрээһини И.С.Гаврильев аатынан Нам 1№ уонна Нам 2№ оскуолаларын, Н.С.Охлопков аатынан гимназия үөрэнээччилэрэ маршировканан арыйдылар.
Бэлиэ күҥҥэ биир дойдулаахпыт, Российскай Федерация Геройа Александр Гаврильевич Колесов ыалдьыттаата. Тэрээһиҥҥэ улуус баһылыга Юрий Слепцов, депутаттар Сэбиэттэрин председателя Алексей Винокуров, “Буойун” общественнай түмсүү салайааччыта Павел Оконешников, байыаннай дьайыылар кыттыылаахтара, кинилэр дьиэ кэргэттэрэ, нэһилиэктэр баһылыктара, тэрилтэлэр салайааччылара, үлэһиттэрэ, общественнас актыбыыстара, Намнааҕы техникум студеннара уонна оскуола үөрэнээччилэрэ сырыттылар.
Көрөөччүлэр экраҥҥа анал байыаннай дьайыыга сылдьар буойуттар тустарынан улуустааҕы суһал быһаарыылаах ыстаабын тэттик устууларын көрдүлэр.
Улууспут баһылыга Юрий Иннокентьевич Слепцов кыргыһыы хонуутугар охтубут байыаннай дьайыы кыттыылаахтарын, хорсун санаалаах биир дойдулаах уолаттарбыт уордьаннарын кинилэр дьиэ кэргэттэригэр туттарда. Российскай Федерация Геройа, биир дойдулаахпыт Александр Гаврильевич Колесов, “Буойун” общественнай түмсүү салайааччыта Павел Николаевич Оконешников кэлбит дьоҥҥо үтүө тылларын, дойдубут кыайыылаах буолан эйэлээх нус-хас олох салҕанарыгар баҕа санааларын, бигэ этиилэрин тиэртилэр.
Тэрээһин хорсун санаалаах, модун сүрэхтээх байыастарга сүгүрүйэр ырыаларынан түмүктэннэ. Кыттыыны ыллылар кэскиллээх ыччаттар Артем Кириллов, Святослав Барабанов, Эрсан Копырин, улууспут киэн туттар талааннаах идэтийбит култуура үлэһиттэрэ Сахая Колодезникова, Сардана Харитонова, Дмитрий Барабанов.
Байыаннай дьайыы бэтэрээннэригэр уонна кыттыылаахтарыгар, саппааска тахсыбыт байыаннайдарга, дойдубутун көмүскээбит уонна көмүскүүр дьоммутугар махталбытын биллэрэбит. Аҕа дойдуну көмүскээччилэрбитигэр эйэлээх олоҕу, ыраас халлааны, кытаанах доруобуйаны, олоххо ситиһиилэри уонна чөл туругу баҕарабыт!
Об авторе
