Олунньу 3 күнүгэр Нам улууһугар көхтөөх олоҕу көҕүлүүр ыччат түһүлгэтэ олохтонно. Үөрүүлээх быһыыга-майгыга улуус депутааттарын сэбиэтин председателя Алексей Винокуров арыйда, улуус баһылыгын солбуйааччы Егор Протопопов Нам ыччата Дойдуга, Саха сиригэр ыытыллар общественнай тэрээһиннэргэ ситиһиилэрин бэлиэтээтэ.
Улууска, ааспыт сыл түмүгүнэн, бастыҥ волонтердарга, ыччат хамсааһынын эйгэтигэр үрдүк көрдөрүүлэх эдэр салайааччыларга, эдэр урбаанньыттарга, общественник ыччаттарга үрдүк Бэлиэлэри, Бочуоттаах грамоталары, махтал суруктары туттардылар.
Социальнай хайысхалаах коммерческайа суох тэрилтэлэри өйүүр уонна Саха сиригэр гражданскай көҕүлээһини сайыннарар биир кэлим ресурснай киин генеральнай директора Ольга Вешникова ыччат общественнай хамсааһына Дойду үрдүнэн ыытыллар Грантовай конкурстарга ханнык хайысахаларга кыттан көдьүүстээх үлэҕэ судаарыстыба өйөбүлүн туһаныан сөбүн кэпсээтэ уонна улуус дьаһалтатын кытта көдьүүстээхтик биир кэлимсэнэн үлэлэһэргэ дуогабар баттаста.
Экраҥҥа Нам улууһун төрүттэниитин, биллиилээх салайааччыларын туһунан видеоролик көрдөрүлүннэ, пленарнай чаас, презентациялары көрүү ыытылынна.
Ааспыт сыл түмүктэринэн бастыҥнары чиэстиир, үүммүт сылга ыытыллар үлэни торумнуур тэрээһини Нам ыччатын хамсааһынын активистарын түмсүүтэ, Хатырык нэһилиэгиттэн “Махсыым уолаттара” ырыа ансаамбыла (сал. Иннокентий Татаринов) ылбаҕай ырыаларынан, И.Е. Винокуров аатынан Намнааҕы педагогическай колледж устудьуоннарын “Энерджи” үҥкүү бөлөҕө киэргэттилэр.
Об авторе
