Тохсунньу 28 күнүгэр, М.К.Аммосов аатынан култуура уонна духуобунай сайдыы дыбарыаһыгар 2025 сыллааҕы нэһилиэктэр икки ардыларыгар түмүгү таһаарар, Россияҕа Аҕа Дойдуну көмүскээччилэр, Саха сиригэр Төрөөбүт Дойдуну көмүскээччи, Нам улууһугар Кыайыы сылларын түмүктүүр, 2026 сылга Россияҕа Норуоттар сомоҕолоһууларын, СӨ Култуура, Нам улууһугар киэн туттар биир дойдулаахпыт, Саха сирин уһулуччулаах государственнай уонна политическай диэйэтэлэ Илья Егорович Винокуров, Дьиэ кэргэн экономикатын, үөрэҕирии эйгэтигэр Эбии үөрэхтээһин сылларын арыйыы үөрүүлээх тэрээһинэ өрө көтөҕүллүүлээхтик буолан ааста.
Мустубут дьону улуус баһылыга Юрий Слепцов, Саха Өрөспүүбүлүкэтин Государственнай Мунньаҕын (Ил Түмэн) бэрэссэдээтэлэ Алексей Еремеев, улуус депутаттарын сэбиэтин бэрэссэдээтэлэ Алексей Винокуров эҕэрдэлээтилэр. Ону сэргэ Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Александр Атласов кыттыыны ылла.
Юрий Слепцов: “2025 сыл биһиги улууспутугар элбэх бэлиэ түгэннэри, чаҕылхай кыайыылары бэлэхтээтэ. Ону тэҥэ ааспыт сыл элбэх тургутуулардаах ааста. Бүгүҥҥү сыл түмүгүн таһаарар үөрүүлээх тэрээһин хас биирдии нэһилиэги саҥа саҕахтарга, кыайыыларга сирдиир бэлиэ күммүтүнэн буолар. Сылбыт түмүгүнэн көрдөххө, биһиги тыа хаһаайыстыбатыгар, тутуу, үөрэх, культура, доруобуйа харыстабылын, спорт эйгэлэригэр, социальнай газификацияҕа ылыллыбыт былааннарбытын барытын толордубут. Бу барыта элбэх үлэ-хамнас барбытын туоһулуур. Доруобуйа харыстабылын систиэмэтигэр, социальнай бырайыактары олоххо киллэриигэ, олох таһымын үрдэтиигэ, анал байыаннай дьайыы кыттыылаахтарын өйөөһүҥҥэ, каадыры бэлэмнээһиҥҥэ, ыччаты патриотическай тыыҥҥа иитиигэ саҥа сүүрээннэри киллэрдибит. Улууспут, нэһилиэктэрбит дьылҕаларыгар санааларынан, сүрэхтэринэн кыһаллар дьоммутугар барҕа махтал буолуохтун. Саҥа сылга хас биирдии нэһилиэк түмүк оҥостон, саҥа соруктары туруоруннун.”
2025 сыл түмүгүнэн үөрүүлээх быһыыга-майгыга тутуу уонна градостроительнай документация, куттал суох буолуутун, экономика уонна үп, сокуону кэһии утары үлэ, тыа хаһаайыстыбатын, урбаан, ыччат, дьиэ кэргэн бэлиитикэтин, маассабай информация, доруобуйа харыстабылыгар, үөрэх, култуура, спорт уонна тыа сирин түөлбэтин эйгэтигэр бастыҥнар чиэстэннилэр.
Үөрүүлээх тэрээһин II-с чааһа — Дойду үрдүнэн Аҕа дойдуну көмүскээччи, Өрөспүүбүлүкэҕэ Ийэ дойдуну көмүскээччи, улууспутугар Кыайыы сылларын түмүктүүр түһүмэх ыытылынна. Театрализованнай дьүһүйүү кэнниттэн улуустааҕы ветеран сэбиэтин бэрэссэдээтэлэ Софья Кобякова Кыайыы сылыгар ыытыллыбыт үлэлэри иһитиннэрдэ.
Улуус баһылыга Юрий Слепцов Аҕа дойду сэриитигэр Улуу Кыайыы 80 сылыгар аналлаах маассабай тэрээһиннэргэ үлэлэспит, улууска үрдүк ситиһиилэри аҕалбыт улуус олохтоохторугар наҕараадалары туттарда. Наҕараадаланааччылар ортолоругар улууспут режиссера Иван Степанович Новиков
Намнааҕы народнай театр режиссера Роман Александрович Герасимов ааттаннылар.
Тэрээһин III чааһынан — Россияҕа Норуоттар сомоҕолоһууларын, Саха Өрөспүүбүлүкэтигэр Культура, Нам улууһугар киэн туттар биир дойдулаахпыт, Саха сирин уһулуччулаах государственнай уонна политическай диэйэтэлэ Илья Егорович Винокуров, Дьиэ кэргэн экономикатын уонна үөрэҕирии эйгэтигэр Эбии үөрэхтээһин сылларын үөрүүлээхтик арыйыы ыытылынна.
Тэрээһини «Ньургуһун» үҥкүү-хор народнай коллективын хормейстера Сардана Харитонова салайааччылаах «Эҥсиэли» ырыа ансаамбыла, Саха Өрөспүүбүлүкэтин култууратын туйгуна Афанасий Татаринов салайар «Добун «эр дьон ырыа ансаамбыла, Намнааҕы народнай театр Улуу Кыайыы, улууска үөрэх эйгэтэ саҕаламмытын туһунан көрдөрөр инсценировкалар, Саха Өрөспүүбүлүкэтин үтүөлээх артыыһа Байбал Сэмэнэп, Саха Өрөспүүбүлүкэтин култууратын туйгуна Айса ырыалара, Василиса Атласова, Раиса Бесчетнова үҥкүүлэрэ киэргэттилэр.
Саҥа үүммүт сыл улууспутугар саҥа саҕахтары арыйыахтын, саҥа ситиһиилэри аҕалыахтын!
Об авторе
