Ахсынньы 16 күнүгэр, М.К. Аммосов аатынан култура уонна духуобунай сайдыы дыбарыаһыгар Нам улууһун киэн туттар киһитэ, государственнай деятель, государственнай сулууспа ветерана, Саха Өрөспүүбүлүкэтин XII ыҥырыылаах Үрдүкү Сэбиэтин народнай депутата, Үрдүкү Сэбиэт бэрэссэдээтэлин солбуйааччы, СӨ I, II ыҥырыылаах Государственнай Мунньаҕын (Ил Түмэн) народнай депутата, Өрөспүүбүлүкэ Палататын бастакы бэрэссэдээтэлэ, Саха Өрөспүүбүлүкэтин норуотун хаһаайыстыбатын бочуоттаах үлэһитэ, Максим Кирович Аммосов аатынан СӨ Государственнай бириэмийэтин лауреата, Сунтаар, Нам улуустарын Ытык киһитэ, СӨ Бочуоттаах гражданина  Егор Михайлович Ларионов 85 сааһын бэлиэтиир үөрүүлээх тэрээһин ыытылынна.

Бу күн Нам улууһун кииннэммит библиотека «Дьон өйөбүлэ — дьылҕам тирэҕэ»,  Нам улууһун норуот маастардарын дьэрэкээн үлэлэрэ выставкаҕа турдулар. 

Бэлиэ күнүнэн кэлбит ыалдьыттары, тэрээһин бары кыттыылаахтарын «Нам кылыһах» (сал. Мария Григорьева-Маайа), «Дорҕоон» (сал. Петр Машников) төрүт дорҕоон бөлөхтөрүн холбоһуктаах сахалыы тыыннаах дьүрүскэннэринэн көрүстүбүт. Тэрээһин саҕаланыыта Егор Михайлович туһунан документальнай киинэтэ көрдөрүлүннэ.  Режиссер Иван Новиков туруоруутунан «Нам улууһун чулуу уолаттара» литературнай композицията, И.Е. Винокуров аатынан Намнааҕы педагогическай колледж «Айылҕан» үҥкүү бөлөҕө (сал. Мария Попова) Эҕэрдэ үҥкүүтүнэн, Татьяна Гаврильева, Иннокентий Иванов, Афанасий Татаринов, Дмитрий Местников ылбаҕай ырыаларынан киэргэттилэр. 

СӨ Ил Дарханын уонна СӨ Бырабыыталыстыбатын дьаһалтатын салайааччы Георгий Михайлов бу  үбүлүөйдээх тэрээһиннэри тэрийсибит, иилээн ыытыспыт А.Ф. Шестаков аатынан Улуустааҕы норуот айымньытын Дьиэтин үлэһиттэригэр махтал суруктары туттарда.