Тыа сирин норуот уус-уран айымньытын сайдыытыгар, саха төрүт үгэстэрин, тылынан уус-уран нэһилиэстибэтин  үүнэр көлүөнэҕэ тиэрдии үлэтин биир сүрүн хайысхатынан олохтоох ааптардар үтүө ааттарын уонна кинилэр айымньыларын үйэтитиигэ туһуламмыт киэҥ хабааннаах тэрээһиннэр буолаллар.

Ахсынньы 14 күнүгэр, Нам улууһун А.Ф. Шестаков аатынан Улуустааҕы норуот айымньытын Дьиэтин режиссера Иван Новиков уонна уус-уран тыл маастарыстыбатын уһуйааччыта Вера Куличкина-Цыпандина  быйылгы юбилейдаах сылга туһуламмыт бырайыактарынан, СӨ култууратын Үтүөлээх үлэһитэ, ССРС култууратын туйгуна, норуот ырыаһыта, импровизатор-хомусчут, алгысчыт, олоҥхоһут, Нам улууһун, Таастаах, Бартыһаан нэһилиэктэрин  Ытык  киһитэ Дмитрий Иванович Кривошапкин «Сур соноҕос аттаах  Алтан Саар бухатыыр» олоҥхото А.Е. Кулаковскай-Өксөкүлээх Өлөксөй аатынан Норуоттар доҕордоһууларын Дьиэтигэр Дьокуускай куорат олохтоохторугар көрдөрүлүннэ.

 Саҥа сүрэхтэнэн, экспертэр үрдүк сыанабылларын туппут олоҥхо үгүс көрөөччү биһирэбилин, киэҥ сэҥээриитин ылла.